कोशी प्रदेश आमसञ्चार विधेयकको विरोधमा ताप्लेजुङका पत्रकारद्वारा प्रशासनमा धर्ना

साहारा लिम्बू
ताप्लेजुङ, भदौ १२ गते । कोशी प्रदेश सरकारले ल्याएको ‘कोशी प्रदेश आमसञ्चार विधेयक’ को विरोधमा ताप्लेजुङका पत्रकारहरूले धर्ना दिएका छन् । जिल्ला प्रशासन कार्यालय ताप्लेजुङको गेटमा एक घण्टा धर्ना दिएका हुन् ।

सरकारले प्रेस स्वतन्त्रतामाथि अङ्कुश लगाउने मनसायले विधेयक ल्याउन लागेको भन्दै नेपाल पत्रकार महासङ्घको नेतृत्वमा धर्ना दिएका छन् । धर्ना कार्यक्रममा पत्रकारहरूले ‘कोशी प्रदेश आमसञ्चार विधेयकमा रहेका प्रेस स्वतन्त्रता विरोधी प्रावधान खारेज गर’ नारा लेखिएको ब्यानर राखेका थिए ।

कोशी प्रदेश सरकारले आम सञ्चार नीति बनाउँदा पत्रकारहरूको मर्म भावना विपरीत सञ्चार विधेयक दर्ता भएको साथै पत्रकारहरूलाई सूचना प्रवाह गर्नेमा अङ्कुश लगाउन खोजिएको प्रति घोर आपत्ति रहेको नेपाल पत्रकार महासङ्घ ताप्लेजुङ शाखाका अध्यक्ष सुवास आचार्यले बताउनुभयो ।

शुक्रबार बिहान ११ बजे देखि मध्यान्ह १२ बजे सम्म एक घण्टा जिल्लाका पत्रकारहरू धर्नामा बसेका थिए ।