ताप्लेजुङ, भदौ ८ गते । आठराई त्रिवेणी गाउँपालिका वडा नं. २ फूलबारीका वडा अध्यक्ष माथि आक्रमण भएको छ । शनिबार बेलुकी वडा अध्यक्ष टेकिन्द्र सेन्दाङ माथि आक्रमणमा भएको हो ।
आक्रमण पछि घाइते हुनुभएका सेन्दाङलाई थप उपचारका लागि जिल्ला बाहिर रेफर गरिएको छ । जिल्ला प्रहरी प्रमुख (डिएसपी) बेदप्रसाद गौतमले सेन्दाङलाई थप उपचारका लागि जिल्ला बाहिर रेफर गरिएको जानकारी दिनुभयो । उहाँका अनुसार वडाध्यक्ष सेन्दाङको टाउको सहित शरीरका बिभिन्न भागमा चोट रहेको छ ।
घाइते सेन्दाङको ताप्लेजुङ जिल्ला अस्पतालमा प्राथमिक उपचार गरिएको थियो । जिल्ला कमिटीको बैठक सकेर घरतर्फ फर्कँदै गर्दा सेन्दाङ माथि फुङ्लिङ बजारको तोक्मेडाँडा क्षेत्रमा ५/७ जनाको समूहले आक्रमण गरेको स्रोतको दावी छ । प्रहरीले आक्रमणमा संलग्नहरूको खोजी कार्य जारी राखिएको बताएको छ ।
घटनाका बारेमा अनुसन्धान सुरु भइसकेको र आक्रमणमा संलग्नलाई चाँडै कानुनी दायरामा ल्याउने प्रहरीले बताएको छ । वडा अध्यक्ष सेन्दाङ नेकपा एमाले ताप्लेजुङका जिल्ला सदस्य हुनुहुन्छ ।
प्रतिक्रिया