ताप्लेजुङ । ताप्लेजुङमा लम्पी स्किनको सङ्क्रमणबाट दुई वटा गाई मरेका छन् । जिल्लाको सिदिङ्वा गाउँपालिका र मेरिङदेन गाउँपालिकामा एक–एक गरी लम्पी स्किनको सङ्क्रमणबाट दुई वटा गाई मरेका हुन् ।
भेटनरी अस्पताल तथा पशु सेवा विज्ञ केन्द्र ताप्लेजुङका प्रमुख डाक्टर रोशन दाहालका अनुसार अहिले सम्म ताप्लेजुङमा ५४ वटा पशुमा लम्पी स्किनको सङ्क्रमण देखा परेको छ । जसमा दुईवटा गाई मरेका हुन् ।
एक नगरपालिका र ८ गाउँपालिका गरी ९ स्थानीय तह रहेको जिल्लाका मिक्वाखोला र पाथीभरा याङवरक गाउँपालिका बाहेक सबै स्थानीय तहहरूमा लम्पी स्किन सङ्क्रमण देखा परेको डाक्टर दाहालको भनाई छ । सबैभन्दा बढी फुङलिङ नगरपालिकाका १९ पशुचौपायामा लम्पी स्किनको सङ्क्रमण पुष्टि भएको छ ।
यस्तै सिदिङ्वा गाउँपालिकाका २, मेरिङदेनका १२, सिरिजङ्गाका ९, फक्ताङलुङका २, मैवाखोलाका २ र आठराई त्रिबेणीका ८ पशुचौपायामा लम्पी स्किनको सङ्क्रमण पुष्टि भएको छ । अहिले सम्बन्धित स्थानीय तह, भेटनरी अस्पताल तथा पशु सेवा विज्ञ केन्द्र तथा मातहतका निकायमार्फत लम्पी स्किनको सङ्क्रमणलाई नियन्त्रण साथै रोकथामका रणनीति अघि बढाइएको डाक्टर दाहालाले बताउनुभयो ।
अहिलेसम्म जिल्लामा ५ हजार ३ सय ५० डोज लम्पी स्किनको सङ्क्रमण विरुद्धको खोप दिइसकिएको भेटनरी अस्पताल तथा पशु सेवा विज्ञ केन्द्र ताप्लेजुङले जनाएको छ ।
प्रतिक्रिया