ताप्लेजुङ । तेश्रो अन्तर्राष्ट्रिय आमन्त्रण ताप्लेजुङ गोल्डकपमा टिकट काट्ने दर्शकले स्मार्ट फोन प्राप्त गर्ने भएको छ । साउन २४ गतेदेखि फुङ्लिङस्थित भानु जन माध्यमिक विद्यालयको खेलमैदान सुरु हुने प्रतियोगितामा टिकट काट्ने दर्शकलाई लक्कि ड्र मार्फत एक स्मार्ट फोनको व्यवस्थापन गरिएको हो ।
लाखेजात्रा सञ्चालन समितिका कोषध्यक्ष दावा शेर्पाका अनुसार दर्शकहरूको आकर्षणका लागि यो व्यवस्था गरिएको हो । गोल्डकपको क्वाटर फाइनलका चार खेलका लागि एक सय रुपैयाँ तोकिएको छ । यस्तै सेमिफाइनलका दुई खेलका लागि दुई सय र फाइनल खेलका लागि दुई सय ५० टिकटदर तोकिएको छ । यो वर्ष गोल्डकपको टिकट बिक्री ठेक्का मार्फत गरिएको । टिकट बिक्रीको ठेक्का मेरिङदेन गाउँपालिका ५ थुकिमाका विशाल लङ्वा लिम्बूले लिनुभएको छ ।
यस्तै गोल्ड कपको खेल तालिका पाथीभरा मन्दिरबाट सार्वजनिक गरिएको छ । खेलकुदको माध्यमबाट पाथीभरा मन्दिरको प्रचारलाई थप मदत पुर्याउने उद्देश्य सहित पाथीभरा धामबाट बिहीबार खेल तालिका सार्वजनिक गरिएको हो ।
प्रतियोगिताको उद्घाटन खेलमा आयोजक तेल्लोक स्पोर्टिङ क्लब र द योङ ब्रोदर्श फुटबल क्लब इटहरी सुनसरीबीच प्रतिष्पर्धा हुने भएको छ । त्यस्तै दोश्रो खेलमा सहारा क्लब पोखरा र रेड स्टार फुटबल क्लब झापाबीच आमनेसामने हुँदैछ । यो दुई टिमबीचको खेल साउन २५ गते हुने तालिकामा उल्लेख छ । साउन २६ गते हुने तेश्रो खेलमा लिजेण्ड फुटबल एकेडेमी सिलगुडी भारत र चर्च ब्वाइज ललितपुरबीच प्रतिष्पर्धा हुनेछ ।
यस्तै क्वाटरफाइनल चरणको अन्तिम खेलमा सलहेस युवा क्लब सिराहा र फिदिम स्पोर्टिङ क्लब पाँचथर भिड्दै छन् । तालिका अनुसार यो दुई टिमबीचको खेल साउन २७ गते हुनेछ । प्रतियोगिताको सेमिफाइनल चरणका खेलहरू साउन २८ र २९ गते हुने तालिका सार्वजनिक भएको छ । फाइनल खेल साउन ३१ गते हुने आयोजकले जनाएको छ । प्रतियोगिताको विजेताले नगद सात लाख दुई हजार बयासी र उपविजेताले तीन लाख ५० हजार बयासी रुपियाँ सहित ट्रफी, मेडल र प्रमाण पत्र प्राप्त गर्ने छन् ।
यस्तै खेलको सर्वोत्कृष्ट खेलाडीलाई यमाहाको बाइक प्रदान गर्ने आयोजकले जनाएको छ । अन्य विभिन्न विधामा समेत उचित नगद पुरस्कार सहित ट्रफी लगायतको व्यवस्था गरिएको समितिले उल्लेख गरेको छ ।
प्रतिक्रिया