ताप्लेजुङ । ताप्लेजुङको आठराई त्रिबेणी गाउँपालिकाले फूलबारी विद्युत सहकारी संस्था नेपाल विद्युत प्राधिकरणलाई हस्तान्तरण नगरे उपभोक्ताहरूको महशुल नतिर्ने भएको छ । आगामी आर्थिक वर्षदेखि फूलबारी विद्युत सहकारी संस्था प्राधिकरणलाई हस्तान्तरण नगरे उपभोक्ताहरूको महशुल नतिर्ने भएको हो ।
सहकारी संस्था विद्युत प्राधिकरणलाई हस्तान्तरण गरी बुझबुझारथ नगरेसम्म पालिकाले फूलबारी विद्युत सहकारी संस्था मातहत रहेका उपभोक्ताहरूको को महशुल आगामी साउन १ गतेदेखि नतिर्ने भएको पालिका प्रमुख प्रशासकीय अधिकृत बाबुनन्दन मेहताले बताउनुभयो ।
पालिकाको वडा नं. २ फूलबारी एकमात्र टिओडी मिटरद्वारा सम्पूर्ण लाभग्राहीको सम्पूर्ण विद्युत महशुल एकमुष्ट रुपमा रिडिङ हुँदै आएको छ । यो प्रणालीमा वडा भित्रका लाभग्राहीले व्यवसायिक रुपमा प्रयोग गर्दै आएको विद्युत महशुल औंल्याउन कठिन भएको अधिकृत मेहताको भनाई छ ।
त्यसैले फूलबारी विद्युत सहकारी संस्थाले नेपाल विद्युत प्राधिकरणलाई सहकारी संस्था हस्तान्तरण गरी बरबुझारथ गर्नु पर्ने पालिकाले जनाएको छ । पालिकाले फूलबारी विद्युत सहकारी संस्थालाई पटक–पटक पत्राचार गरी विद्युत सहकारी संस्था नेपाल विद्युत प्राधिकरणलाई हस्तान्तरण गर्न आग्रह गर्दा समेत सहकारी संस्थाले अटेर गरेको दावी गरेको छ ।
पछिल्लो निर्वाचित जनप्रतिनिधिको वर्तमान कार्यकालमा आठराई त्रिवेणी गाउँपालिका भरीका उपभोक्ताले घरायसी प्रयोजनमा प्रयोग गरेको विद्युत महशुल पालिकाले तिर्दै आएको छ ।
प्रतिक्रिया