ताप्लेजुङ । ताप्लेजुङमा ब्राउन सुगरसहित ४ जना परेका छन् । लागू औषध बिक्री वितरण गरिरहेको गोप्य सूचनाको आधारमा बुधबार साँझ उनीहरु पक्राउ परेका हुन् ।
पक्राउ पर्नेमा फुङलिङ नगरपालिका वडा नं. ११ घर भइ हाल फुङलिङ ४ कोप्चे लाइनमा डेरा गरि बस्दै आएका २३ वर्षीय रोमन बिक, फक्ताङलुङ गाउँपालिका तीन घर भइ हाल फुङलिङ नगरपालिका ६ सिर्जना चोक निवासी ३२ वर्षीय मन्दीप लिम्बू, भारतीय नागरिक मनोज साह र देव बहादुर विश्वकर्मा रहेका छन् ।
जिल्ला प्रहरी कार्यालय ताप्लेजुङका सूचना अधिकारी तथा प्रहरी निरीक्षक बिवेक बस्नेतका अनुसार रोमन बिकको कोठाबाट लागू औषध खैरो हेरोइन जस्तो देखिने प्लास्टिक सहित ४३० मिली ग्राम बरामद गरिएको छ । रोमनलाई मन्दीप लिम्बू लागू औषधको बेचविखन कारोबार गर्दा पैसा दिन्छु भने पछि रोमनले ब्राउन सुगर ल्याएको अनुसन्धानबाट खुलेको प्रहरी निरीक्षक बस्नेतको भनाई छ ।
यस्तै उक्त लागू औषध भारतीय नागरिक मनोज साह र देव बहादुर विश्वकर्मा समेत किन्न आएको अवस्थामा नियन्त्रणमा लिइ थप अनुसन्धान अघि बढाइएको प्रहरीको भनाई छ ।
प्रतिक्रिया