ताप्लेजुङमा तमोर नदीले बगाएर बालिका बेपत्ता

ताप्लेजुङ । ताप्लेजुङमा तमोर नदीले बगाएर एक बालिका बेपत्ता भएका छन् । बेपत्ता हुनेमा फुङलिङ नगरपालिकाका ३ टाँरबारीका निङसा साङगे शेर्पाका ११ वर्षीया छोरी रहेका छन् । 

बालिकालाई तिर्खा लागेर पानी पिउन तमोर नदीमा जाँदा चिप्लिएर बेपत्ता भएको स्थानीयले बताएको जिल्ला प्रहरी कार्यालय ताप्लेजुङका सूचना अधिकारी तथा प्रहरी निरीक्षक विवेक बस्नेतले जानकारी दिनुभयो । उहाँका अनुसार बिहीबार बालिका आफ्ना ५ जना साथीसँग फुङलिङ नगरपालिकाको डम्पिङ साइडको फोहोरमा फालेको सामानमा केही सामाग्री खोज्न गएका थिए ।

सोही क्रममा प्यास मेटाउन नदीमा जाँदा ढुङगाबाट चिप्लिएर बेपत्ता भएको अन्य बालिकाहरूले बताएको स्थानीयको भनाइ छ । विहीबार दिउँसो करिब साढे पाँच बजेको समयमा बालिकालाई नदीले बगाएर बेपत्ता बनाएको प्रहरीको भनाई छ ।