ताप्लेजुङ । ताप्लेजुङमा अन्तरजातीय विवाह गर्ने जोडी सम्मानित भएका छन् । १९ औं जातीय छुवाछुत तथा भेदभाव उन्मूलन राष्ट्रिय दिवसको अवसरमा अन्तरजातीय विवाह गर्ने जोडी सम्मानित भएको हो ।
बुधबार दिवसको अवसरमा दलित एकता समाज ताप्लेजुङले वृहत कार्यक्रमको आयोजना गरि जिल्लाभित्र हालसम्म अन्तरजातीय विवाह गरेको ५० जोडीलाई सम्मान गरेको समाजका सल्लाहाकार गंगाराम शंकरले जानकारी दिनुभयो । दिवसकै अबसरमा दलित समुदायबाट एसईईमा उत्कृष्ट नतिजा ल्याउने र उत्कृष्ट खेलाडीलाई समेत सम्मान गरेको छ ।
यस्तै समाजका अध्यक्ष अम्बर बहादुर विश्वकर्माका अनुसार नौमती बाजालाई संरक्षण गर्न योगदान पुर्याउने व्यक्तिलाई समेत प्रोत्साहन स्वरुप सम्मान गरिएको छ । संरक्षणका लागि बाजा पनि नयाँ पुस्तासमक्ष बाजा प्रदर्शन तथा प्रस्तुत गरिएको थियो ।
राज्यले छुवाछुतमुक्त राष्ट्र घोषणा गरेपनि समाजमा अझै छुवाछुत कायमै रहेकाले पूर्ण रुपमा निर्मूल गर्न, जनचेतना जगाउन कार्यक्रमको आयोजना गरिएको समाजले जनाएको छ ।
कार्यक्रममा फुङ्लिङ नगरपालिकाका प्रमुख अमिर मादेन, उपप्रमुख भिमादेवी ओझा, मेरिङ्देन गाउँपालिकाका उपाध्यक्ष दुर्गा प्रसाद सिरेङ्चोङ्बाङ, दलका प्रतिनिधि लगायतको उपस्थिति रहेको थियो ।
प्रतिक्रिया