ताप्लेजुङ । मिक्वाखोला गाउँपालिकाले विद्यार्थीहरूलाई पुस्तक वितरणको कार्य सुरु गरेको छ । गाउँपालिकाले बालविकास कक्षादेखि अङ्ग्रेजी माध्यमबाट अध्यापन सुरु गर्ने निर्णयअनुसार २९ वटा विद्यालयका ३६० जना विद्यार्थीहरूलाई पुस्तक वितरण गर्ने लक्ष्य अनुरूप पुस्तक वितरणको कार्य सुरु गरेको हो ।
जसमा विहीबार साँवा माध्यमिक विद्यालयका बाल कक्षामा अध्ययनरत ११ जना विद्यार्थीहरूलाई पुस्तक तथा कापी वितरण गरिएको गाउँपालिका अध्यक्ष भक्तबहादुर कार्कीले बताउनुभयो । यस पुस्तक वितरणको कार्यलाई मिक्वाखोला गाउँपालिका वडा नं. ४ घर भई हाल वैदेशिक रोजगारको सिलसिलामा विदेश रहनुभएका मिङ्मा छिरिङ शेर्पाले पनि गाउँपालिकालाई आर्थिक सहयोग गर्नुभएको अध्यक्ष कार्कीको भनाई छ ।
पुस्तक मिक्वाखोला गाउँपालिकाका अध्यक्ष कार्की, प्रमुख प्रशासकीय अधिकृत विमल गौतम, वडा नं। ४ का वडा सदस्य फुपु तेन्जीङ शेर्पा र शिक्षा शाखा प्रमुख पवन भट्टराई साथै विद्यालयका शिक्षकहरूको उपस्थितिमा वितरण गरिएको छ । साथै आगामी दिनमा २९ वटै विद्यालयका बाल कक्षाका विद्यार्थीहरूलाई पुस्तक वितरण गरिने अध्यक्ष कार्कीले बताउनुभयो ।
यस्तै अर्को वर्षको शैक्षिक सत्रदेखि कक्षा एकका विद्यार्थीहरूलाई पनि पुस्त वितरण गरिने गाउँपालिकाले जनाएको छ ।
प्रतिक्रिया