ताप्लेजुङ । नेपाल कम्युनिष्ट पार्टी एकीकृत समाजवादी ताप्लेजुङले जिल्ला अधिवेशनमा दुई सय ५० प्रतिनिधि सहभागी गराउँने भएको छ । अधिवेशनमा जिल्ला सम्मेलन आयोजक कमिटी, पार्टी सदस्य सङ्ख्याको आधारमा चयन हुने प्रतिनिधि र जनवर्गीय सङ्गठन सहित दुई सय ५० प्रतिनिधि सहभागी गराउने भएको हो ।
बुधबार फुङलिङमा एक पत्रकार सम्मेलनको आयोजना गरी ११औं अधिवेशनको जानकारी गराउँदै प्रतिनिधि सहभागीको बारे पार्टी जिल्ला सचिव मोहन न्यौपानेले जानकारी गराउनुभएको छ । पार्टीको ११औं जिल्ला अधिवेशन आगामी जेठ नौं गते हुँदै छ ।
पत्रकार सम्मेलनमा नेताहरूले अधिवेशनबाट सर्वसम्मत नेतृत्व चयन हुने विश्वास व्यक्त गर्नु भएको छ । उद्घाटन सत्र र बन्दसत्र पछि निर्वाचन कार्यक्रममा जाने तर सर्वसम्मत नेतृत्व चयन हुने विश्वास नेकपा एस जिल्ला उपाध्यक्ष दुर्गाहाङ श्रेङचोङबाङले व्यक्त गर्नुभएको छ ।
नेकपा एसको जिल्ला कमिटीमा ७ जनाको पदाधिकारी रहने व्यवस्था रहेको छ । जिल्ला अधिवेशनको उद्घाटन पार्टीका बरिष्ठ उपाध्यक्ष राजेन्द्रप्रसाद पाण्डेले गर्नुहुने बताइएको छ । यसअघि पार्टी केन्द्रीय अध्यक्ष तथा पूर्व प्रधानमन्त्री माधवकुमार नेपालले अधिवेशनको उद्घाटन गर्ने भनिएको थियो । नेपालको स्वास्थ्य समस्याका कारण बरिष्ठ उपाध्यक्ष पाण्डे प्रमुख अतिथि हुनुहुने भएको हो ।
साथै पत्रकार सम्मेलन मार्फत ११औं अधिवेशनका लागि तयार पारिएको लोगो समेत सार्वजनिक गरिएको छ ।
सार्वजनिक गरिएको लोगो
प्रतिक्रिया