ताप्लेजुङ। ताप्लेजुङको आठराई त्रिवेणी गाउँपालिकालाई पूर्ण खोप सुनिश्चित पालिका घोषणा गरिएको छ । सोमबार एक कार्यक्रमका साथ पालिकालाई पूर्ण खोप सुनिश्चित पालिका घोषणा गरिएको हो ।
गाउँपालिकाको पाँच वटै वडालाई पूर्ण खोप वडा घोषणा गरिए सँगै गाउँपालिकालाई पूर्ण खोप पालिका घोषणा गरिएको गाउँपालिका अध्यक्ष दिपेन्द्र पोमु (दिपेन)ले बताउनुभयो । उहाँका अनुसार पालिकाको वडा नं. एक, दुई र पाँचलाई गत चैत १३ गते पूर्ण खोप वडा घोषणा गरिएको थियो।
यस्तै वडा नं. तीन लाई चैत १४ गते र वडा नं. ४ लाई चैत १२ गते पूर्ण खोप वडा घोषणा गरिएको थियो । पाँच वडा भएको गाउँपालिकाले पूर्ण खोप पालिकाको घोषणा कार्यक्रममार्फत वडा र विभिन्न व्यक्तित्वहरूलाई सम्मान गरेको छ । पालिकाले पूर्ण खोप सुनिश्चित पालिका घोषणा गर्ने अभियानको भूमिका निर्वाह गर्ने पाँच वटै वडालाई सम्मान गरिएको छ ।
यो सँगै सम्बन्धित स्वास्थ्य संस्था, प्रत्येक वडाका एक एक जना उत्कृष्ट महिला स्वास्थ्य स्वयंसेविका र एक जना खोप स्वास्थ्य कार्यकर्तालाई सम्मान गरेको छ । गाउँपालिका अध्यक्ष पोमूको अध्यक्षतामा सम्पन्न भएको पूर्ण खोप सुनिश्चित पालिका घोषणा कार्यक्रममा गाउँपालिका उपाध्यक्ष शान्ता कुमारी आङबुहाङ, जनस्वास्थ्य प्रमुख कुल बहादुर पौडेल लगायतको उपस्थित रहेको थियो ।
एउटा नगरपालिका र आठ वटा गाउँपालिका भएको ताप्लेजुङको सिदिङ्वा गाउँपालिका यस अघि नै पूर्ण खोप सुनिश्चित पालिका घोषणा भइ सकेको छ । यो सँगै ताप्लेजुङका दुई वटा पालिका पूर्ण खोप सुनिश्चित पालिका घोषणा भएको हो ।
प्रतिक्रिया