ताप्लेजुङ । ताप्लेजुङको सिरिजङ्गा गाउँपालिका वडा नं. ३ सिकैचाको वडाध्यक्षका लागि भएको उपनिर्वाचन सम्पन्न भएको छ । उक्त उपनिर्वाचनमा जम्मा ५८.३१ प्रतिशत अर्थात ८९१ जनाले मतदान गरेका छन् ।
सरस्वती माबी कुन्जारी मतदान स्थलमा जम्मा ५९.९४ प्रतिशत मत खसेको छ । जसमा २८९ महिला र ३२६ पुरुष गरी जम्मा ६१५ जना मतदाताले मतदान गरेका हुन् ।
यस्तै दुर्गा माबी ओसे मतदान स्थल मा ५४.९८ प्रतिशत मत खसेको छ । जसमा ११६ महिला र १६० पुरुष गरी जम्मा २७६ जानाले मतदान गरेका हुन् । उक्त क्षेत्रमा एक हजार ५८ मतदाता रहेका थिए ।
सिकैचामा रिक्त रहेको वडाध्यक्ष पदका लागि ५ ओटा दलको प्रतिस्पर्धा रहेको थियो । नेपाली काँग्रेसबाट भीमकुमार लक्सम्बा लिम्बू, नेकपा एमालेबाट कुमारी साउदेन लिम्बु, नेकपा माओवादी केन्द्रबाट अम्बि साउदेन लिम्बू, राष्ट्रिय स्वतन्त्र पार्टी रास्वपा) बाट देवीप्रसाद पौडेल र सङ्घीय लोकतान्त्रिक राष्ट्रिय मञ्च, सङ्घीय लिम्बूवानबाट राजेन्द्र काङ्वा लिम्बूले उम्मेद्वारी दिएका हुन् ।
एमालेकी उम्मेद्वार कुमारी साउदेन यसअघिको निर्वाचनमा झिनो मतान्तरले पराजित हुनुभएको थियो भने माओवादीका उम्मेद्वार अम्बि साउदेनले वडा सदस्यबाट राजीनामा दिएर वडाध्यक्षका लागि उम्मेद्वारी दिनु भएको हो ।
२०७९ सालको स्थानीय तहको निर्वाचनमा काँग्रेस, माओवादी केन्द्र र नेकपा एसको गठबन्धनबाट बिजयी हुनु भएका दिलप्रसाद बोखिमले राजिनामा दिएसँगै सो क्षेत्रमा उपनिर्वाचन भएको हो ।
प्रतिक्रिया