ताप्लेजुङको फुङलिङमा प्राकृतिक रुपमा उम्रिएका गाँजा नष्ट गरियो

साहारा लङ्वा लिम्बू

ताप्लेजुङ । ताप्लेजुङको फुङलिङमा प्राकृतिक रुपमा उम्रिएका गाँजा नष्ट गरिएको छ ।जिल्ला प्रहरी कार्यालय ताप्लेजुङको प्रहरी सहायक निरीक्षक रोहित फागोको नेतृत्वमा खटेको प्रहरीको टोलिले शुक्रबार गाँजा फडानी गरी नष्ट गरेको हो ।

फुङलिङ नगरपालिका ३ मेदिबुङस्थित पदमलाल भारतीको जग्गामा रहेको गाँजाको बगान फडानी गरिएको जिल्ला प्रहरी कार्यालय ताप्लेजुङका प्रहरी निरीक्षक तथा सूचना अधिकारी कमलकुमार लङ्गेलीले जानकारी दिनुभयो ।

प्रहरी निरीक्षक लुङ्गेलीका अनुसार भारतीको अन्दाजी ६ आना जग्गामा रहेको करिब ४० बोट गाँजा फडानी गरि नष्ट गरिएको छ । फाँडिएको गाँजाको बोटलाई आगोमा जलाएर पुर्ण रुपमा नष्ट गरिएको प्रहरीले जनाएको छ । प्रहरीका अनुसार युवा पुस्तामा गाँजाको प्रयोगलाई न्युनिकरण गर्नका लागि बगान नष्ट पारिएको हो ।

नेपाल गाँजा खेतीको प्रचुर सम्भावना भएको देश भएपनि लागू औषधमा पर्ने भएकाले प्रहरीले यसलाई नष्ट गर्ने अभियान नै जारी राखेको छ । गाँजाको सदुपयोग भन्दा धेरै दुरुपयोग गरिएको हुनाले नेपालमा गाँजा खेतीलाई प्रतिबन्ध लगाइएको छ ।