सिदिङ्वा रनिङ शिल्ड भलिबलको उपाधि पाथीभरा याङ्वरकलाई

ताप्लेजुङ । ताप्लेजुङको सिदिङ्वा गाउँपालिकामा सम्पन्न प्रथम सिदिङ्वा रनिङ शिल्ड भलिबल प्रतियोगिताको उपाधि पाथीभरा याङ्वरक गाउँपालिकाले हात पारेको छ । आज भएको फाइनलमा आयोजक सिदिङ्वा गाउँपालिकालाई ३–१ को सेटमा हराउँदै पाथीभरा याङ्वरकले उपाधि हात पारेको हो ।

फाइनल खेलमा २७–२५ ले पहिलो सेट जितेको सिदिङ्वालाई पाथीभरा याङ्वरकले लगातार दोस्रो, तेस्रो र चौथो सेट २५–२१, २५–२१, २५–१३ ले जित हात पार्दै उपाधि जित्न सफल भएको सिदिङ्वा गाउँपालिका उपाध्यक्ष कृष्णकुमारी कडरियाले बताउनुभयो ।

उपाधि जितसँगै पाथीभरा याङ्वरक गाउँपालिकाले रनिङ शिल्डसहित दुई लाख ५० हजार रुपियाँ पुरस्कार प्राप्त गरेको छ । उपविजेता बनेको सिदिङ्वा गाउँपालिकाले एक लाख २५ हजार रुपियाँमा चित्त बुझाउनु परेको छ ।

तृतीय र चौथो स्थान प्राप्त गरेका अन्य दुई टोलीलाई सान्त्वना पुरस्कार स्वरूप समान २५ हजार रुपियाँका दरले प्रदान गरिएको छ । शुक्रबारदेखि सुरु भएको प्रतियोगितामा पाँचथरका दुईसहित सात टोलीका सहभागिता रहेको थियो ।