ताप्लेजुङ । जनता समाजवादी पार्टी नेपालसहित ६ राजनीतिक दलले ताप्लेजुङको पाथीभरा मुक्कुमलुङ क्षेत्रमा केबलकार निर्माण गर्न नहुने भनेका छन् । सोमबार एक विज्ञप्ति जारी गर्दै उक्त दलहरूले पाथीभरा पवित्र धार्मिक तथा ऐतिहासिक सांस्कृतिक स्थल भएकाले केबलकार निर्माण गर्न नहुने जनाएको हो ।
जनता समाजवादी पार्टीसहित संघीय लोकतान्त्रिक राष्ट्रिय मञ्च, राष्ट्रिय जनमुक्ति पार्टी, नेपाल कम्युनिस्ट पार्टी, वैज्ञानिक समाजवादी मोर्चा र लिम्बूवान क्रान्तिकारी पार्टीले केबलकार निर्माणविरुद्ध संयुक्त विज्ञप्ति निकालेका छन् । केबलकार निर्माण प्रक्रिया सुरु गर्नु धार्मिकस्थल साथै आदिवासीहरूको मौलिक पहिचानमाथि अतिक्रमण र हस्तक्षेप भएको विज्ञप्तिमा उल्लेख गरिएको छ ।
त्यस्तै परियोजनाको प्रक्रिया सुरु गर्दैदेखि गलत नियत राखेको पाइएकाले परियोजनाको विरोध गर्नुपरेको पनि विज्ञप्तिमा जनाइएको छ । केबलकार परियोजना कार्यान्वयन गर्ने प्रक्रियासँगै जग्गा खरिद प्रकरण र पछिल्लो पटक सशस्त्र प्रहरी बलको बेस क्याम्प राख्ने विषय असह्य हुने विज्ञप्तिमा उल्लेख गरिएको छ ।
जिल्ला समन्वय समिति ताप्लेजुङको समन्वयमा सोमबार बसेको सर्वपक्षीय बैठकले भने केबलकार निर्माणको कामलाई अघि बढाउने निर्णय गरेको छ । नेपाल उद्योग वाणिज्य महासङ्घका अध्यक्षसमेत रहनुभएका चन्द्रप्रसाद ढकालको नेतृत्वमा पाथीभरा मुक्कुमलुङ दर्शन केबलकार प्रालिले परियोजना निर्माण गर्नका गर्न लागेको हो ।
![](https://i0.wp.com/radiokabeli.com/wp-content/uploads/2024/02/863c6fed-16c4-4ccd-8538-a48a6fbd059e.jpg?resize=530%2C768&ssl=1)
प्रतिक्रिया