चासोक तङ्नामको अवसरमा प्रथम कञ्चनजंघा सेसेलुङ गोल्ड कप सुरु, चक्रघट्टी सँग आयोजक पराजित

ताप्लेजुङ । चासोक तङ्नाम पर्वको अवसरमा आमन्त्रित प्रथम कञ्चनजंघा सेसेलुङ गोल्ड कप आजबाट सुरु भएको छ । फुङलिङ नगरपालिकाको नगर प्रमुख अमिर मादेनको प्रमुख आतिथ्यतामा गोल्ड कप सुरु भएको छ ।

भानु जन मा। वि। को खेल मैदानमा आज भएको उद्घाटन खेलमा चक्रघट्टी फुटबल क्लब सुनसरीले आयोजक क्लब कञ्चनजंघा क्लब फुङलिङ ताप्लेजुङलाई २-१ गोलको अन्तरले पराजित गरेको छ । 

प्रतियोगितामा ८ टिमको सहभागिता रहेको आयोजक कञ्चनजंघा फुङलिङ क्लबले जनाएको छ । जसमा सगरमाथा युथ क्लब मोरङ, बी।टि।फुटबल क्लब तेह्रथुम, जलथल फुटबल क्लब झापा, पाँचथर फुटबल क्लब पाँचथर, आठराई गाउँपालिका तेह्रथुम, रारा फुटबल क्लब धनकुटा र आज जित हासिल गर्ने चक्रघट्टी फुटबल क्लब सुनसरीको सहभागिता रहेको छ । 

त्यस्तै आयोजकको तर्फबाट कञ्चनजंघा फुङलिङ क्लबले खेलमा सहभागिता जनाएको हो । प्रतियोगिताको विजेताले नगद ३ लाख २ हजार ८० र उपविजेताले १ लाख ५१ हजार ८० रुपैयाँ सहित ट्रफी, मेडल, प्रमाण पत्र प्राप्त गर्ने चासोक तङनाम सञ्चालक समितिले जनाएको छ । 

त्यस्तै लिम्बू समुदायमा आधारित मौलिक नृत्यहरू च्याब्रुङ नाच, धान नाच, छेलो, धनुषकाँड, हाक्पारे, ख्याली सहितका प्रतियोगिता हुने भएका छन् । च्याब्रुङ प्रतियोगितामा धरान र झापाले पनि सहभागिता जनाउँने आयोजकले जनाएको छ । च्याब्रुङतर्फ प्रथमले ५० हजार, द्वितीयले ४० हजार र तृतीयले ३० हजार रुपैयाँ नगद पुरस्कार प्राप्त गर्ने भएका छन् । 

धन नाच तर्फ प्रथमलाई हुनेले १५ हजार, द्धितियलाई १० हजार र तृतीय हुनेलाई ५ हजार प्रदान गरिने भएको छ । प्रतियोगिता सम्पन्न गर्न करिव ५६ लाख रुपैयाँ खर्च हुने आयोजक संस्थाका अध्यक्ष अशोक थेबेले जानकारी दिनुभयो । 

प्रतियोगिताको सेमिफाइनल अघिका सबै खेलको प्रवेश शुल्क जनही एक सय रुपैयाँ निर्धारण गरिएको समेत आयोजक संस्थाले जनाएको छ । स्थानीय तथा राष्ट्रिय कलाकारको साथमा साङ्गतिक तथा सांस्कृतिक कार्यक्रम समेत हुने भएको छ । चासोक तङनाम सञ्चालक समिति र ङावोरक सङजुम्भो फुङलेङले कार्यक्रमको संयोजन समन्वय गरेका छन् ।