ताप्लेजुङ, कात्तिक २८ गते । ताप्लेजुङको पाथीभरा याङ्वरक गाउँपालिका–१ खहरेस्थित मेची राजमार्गमा दुई वटा बस एकआपसमा ठोक्किँदा तीन जना घाइते भएका छन् ।
शुक्रबार दिउँसो ताप्लेजुङबाट झापातर्फ जाँदै गरेको प्रदेश ३–०१–००६ ख ०५९६ नम्बरको बस र विपरीत दिशाबाट आउँदै गरेको बागमती प्रदेश ०१–००६ ख ५६५८ नम्बरको बस एकआपसमा ठोक्किएर दुर्घटना भएको हो ।
दुर्घटनामा परी तीन जना महिला घाइते भएका जिल्ला प्रहरी कार्यालय ताप्लेजुङले जनाएको छ । घाइते हुनेमा भक्तपुर नगरपालिका–३ वंशगोपालकी ४८ वर्षीया लक्ष्मी सोनेप, सूर्यविनायक नगरपालिका–६ फलाटेकी ३८ वर्षीया सुनिता सोह्ङमिखा र काठमाडौंको तारकेश्वर नगरपालिका–४ की ४७ वर्षीया सुनिता कटुवाल रहनुभएको छ ।
प्रहरीका अनुसार तीनै जनाको टाउकोमा चोट लागेको छ । उहाँहरूको अवस्था मध्यम रहेको र बोल्न सक्ने अवस्थामा रहेको प्रहरीले जनाएको छ ।
घाइते तीनै जनालाई उपचारका लागि पाँचथर जिल्ला अस्पताल फिदिम पठाइएको छ । दुर्घटनाको कारणबारे थप अनुसन्धान भइरहेको प्रहरीले जनाएको छ ।
प्रतिक्रिया