ताप्लेजुङ, कात्तिक १३ गते । ताप्लेजुङको फुङ्लिङमा राष्ट्रिय विभूति महागुरु फाल्गुनन्द लिङ्देनको १४२औँ जन्मजयन्ती विभिन्न कार्यक्रम गरी मनाइने भएको छ । किरात धर्म तथा साहित्य उत्थान सङ्घ जिल्ला समिति ताप्लेजुङको आयोजनामा आगामी कात्तिक २५ गते फुङ्लिङ नगरपालिका–६ काहुलेस्थित किरात हाङसाम माङहिममा जन्मजयन्ती मनाउन लागिएको हो ।
जन्मजयन्तीका अवसरमा धार्मिक अनुष्ठान, विभिन्न जातीय सांस्कृतिक झाँकी, महागुरु फाल्गुनन्दको प्रतिमामा माल्यार्पण, दीप प्रज्वलन तथा सांस्कृतिक कार्यक्रम आयोजना गरिने सङ्घका सचिव सरोज कङ्लिबाले जानकारी दिनुभएको छ । उहाँका अनुसार कार्यक्रममा महागुरु फाल्गुनन्दको जीवनीमाथि चर्चा, शुभकामना आदानप्रदानलगायत कार्यक्रमसमेत गरिनेछ ।
कात्तिक २२ गतेदेखि कार्यक्रमका लागि उपस्थित हुने तथा २३ गते माङहिम परिसर सजावट र तयारी गर्ने कार्यक्रम छ । कात्तिक २४ गते बिहान साक्मुरा वदेम्मा तथा येत नाम्धुङ लाधुङ सेमिसेवा धार्मिक अनुष्ठान सञ्चालन गरिनेछ । जन्मजयन्तीका दिन कात्तिक २५ गते विभिन्न जातीय सांस्कृतिक झाँकीसहित ¥याली निकालिनेछ ।
¥यालीमा सहभागी हुन बिहान ११ बजे फुङ्लिङको कबडहल लाइन टुक्रेमा भेला हुन आयोजकले आग्रह गरेको छ । सहभागीलाई आफ्नो मौलिक तागामेख्ली पोसाक र माङबाजासहित उपस्थित हुन अनुरोध गरिएको छ ।
किरात धर्मको उत्थान, विश्व शान्ति, मानव एकता र सामाजिक सुधारमा योगदान पु¥याउनुभएका महागुरु फाल्गुनन्दलाई नेपाल सरकारले १६औँ राष्ट्रिय विभूतिको रूपमा सम्मान गरेको छ ।
प्रतिक्रिया