शान्ति सुरक्षा थप सुदृढ बनाइने डिएसपी जोशीको भनाई

ताप्लेजुङ, जेठ १५ गते । ताप्लेजुङका नयाँ प्रहरी प्रमुख (डिएसपी) उमेश जोशीले जिल्लाको शान्ति सुरक्षाको अवस्था थप सुदृढ बनाइने बताउनुभएको छ । बिहीबार सञ्चारकर्मीसँग परिचयात्मक कार्यक्रममा बोल्नुहुँदै उहाँले शान्ति सुरक्षा कुनै सम्झौताहीन विषय भएकाले यसमा कुनै कमजोरी हुन नदिइने स्पष्ट पार्नुभएको हो ।

कार्यभार सम्हालेसँगै जिल्लाको समग्र अवस्थाबारे प्रारम्भिक जानकारी लिइसकेको र आवश्यक ‘एक्सन’ समेत सुरु गरिएको डिएसपी जोशीले बताउनुभयो । उहाँले अत्यधिक गति भएका सवारीसाधनमाथि निगरानी बढाइएको तथा आवश्यक कारबाही प्रक्रिया अघि बढाइएको बताउनुभयो ।

सदरमुकाम फुङलिङमा बढ्दो सवारी जाम व्यवस्थापन गर्न जिल्ला ट्राफिक प्रहरी कार्यालयलाई निर्देशन दिइसकेको उहाँले बताउनुभयो । पार्किङ व्यवस्थापनका लागि कार्ययोजना तयार पारिएको र चाँडै कार्यान्वयनमा ल्याइने उहाँको भनाइ छ ।

उहाँले लागुऔषध दुव्र्यसन नियन्त्रण, अवैध सवारीसाधनको प्रयोग रोकथाम तथा अन्तरसीमा गतिविधिमाथि नियमित निगरानी गरिने जानकारी दिनुभयोय । चीन र भारतसँग जोडिएको ताप्लेजुङको भौगोलिक संवेदनशीलतालाई ध्यानमा राखेर सुरक्षा व्यवस्थापनलाई थप प्रभावकारी बनाइने उहाँको भनाई छ ।

सञ्चार क्षेत्रसँग सहकार्य गर्दै सूचनामा सहज पहुँच प्रदान गर्ने प्रतिबद्धता व्यक्त गर्नुभएका डिएसपी जोशीले विपद्का पूर्वतयारी तथा प्रतिकार्यमा पनि समुदायसँग निरन्तर समन्वय गरिने बताउनुभयो ।

डिएसपी बेदप्रसाद गौतमको सरुवा भएपछि गत आइतबार जोशी ताप्लेजुङ जिल्ला आउनुभएको हो ।