ताप्लेजुङ २६, माघ २५ गते । ताप्लेजुङमा करिव एक हजार तीन सय किशोरीहरूलाई पाठेघरको मुखको क्यान्सर रोकथामका लागि ह्युमन पापिलोमा भाइरस ९एचपीभी० खोप दिइने भएको छ । यही माघ २८ देखि फागुन १ गतेसम्म एचपीभी खोप अभियान सञ्चालन हुने भएको हो ।
खोप अभियानमा एक हजार ३४२ जनालाई एचपीभी खोप प्रदान गरिने लक्ष्य रहेको स्वास्थ्य कार्यालय ताप्लेजुङका खोप अधिकृत दिनेश रायले जानकारी दिनुभयो । उहाँका अनुसार १० देखि १४ वर्ष उमेर समूहका विद्यालयमा अध्ययनरत किशोरी र विद्यालय बाहिर रहेकालाई समेत खोप अभियानमा समावेश गरिने छ ।
ताप्लेजुङमा अघिल्लो वर्षको अभियानमा दुई जना मात्र किशोरी खोप लगाउनबाट छुटेका थिए । अधिकृत रायले भन्नुभयो, “अघिल्लो वर्ष अहिलेसम्म दुईजना छुटेको देखिएको छ, छुटेका अरु भेटिए लक्षित उमेर समूहलाई हामी खोप अभियानमा समावेश गर्ने छौँ ।”
एचपीभी खोप अभियानका लागि ताप्लेजुङमा दुई सय सात वटा खोप केन्द्र निर्धारण भएका छन् । आधिकांश खोप केन्द्र विद्यालयमा रहने देखिएको छ । खोप अभियानका क्रममा दुई सय तीन जना स्वास्थ्यकर्मी तथा दुई सय सात जना स्वयंसेविका खटिने भएका छन् । खोपको अनुगमन तथा सुपरीवेक्षणका क्रममा ७६ जना जनशक्ति परिचालित हुने खोप अधिकृत रायले जानकारी दिनुभयो ।
प्रतिक्रिया