ताप्लेजुङ, माघ २१ गते । ताप्लेजुङको उत्तरी हिमाली क्षेत्र ओलाङचुङगोलाका ज्येष्ठ नागरिक र फरक क्षमता भएका २० जनालाई न्यानो सिरक प्रदान गरेको छ । सिद्धार्थ बैङ्क लिमिटेड फुङलिङ शाखाले ओलाङचुङगोलाका ज्येष्ठ नागरिक र फरक क्षमता भएका २० जनालाई न्यानो सिरक प्रदान गरेको हो ।
दुर्गम तर महत्वपूर्ण पर्यटकीय स्थलको रुपमा समेत परिचित फक्ताङलुङ गाउँपालिका–७ मा पर्ने ओलाङचुङगोलामा पुगी बैङ्कका प्रतिनिधिले संस्थागत सामाजिक उत्तर दायित्व अन्तरगत ५० हजार मूल्य बराबरको न्यानो सिरक बितरण गरिएको सिद्धार्थ बैंक लिमिटेडको फुङलिङ शाखाका प्रबन्धक घनेन्द्र गुरुङले जानकारी दिनुभयो । कार्यक्रममा फक्ताङलुङ गाउँपालिका–७ ओलाङचुङगोलाका वडाअध्यक्ष छेतेन वालुङ शेर्पालगायत स्थानीयहरुको उपस्थिति रहेको थियो ।
वडाअध्यक्ष शेर्पाले दुर्गम गाउँका स्थानीयको आवश्यकतालाई मध्यनजर गर्दै गरिएको सहयोगप्रति सहयोगी निकायलाई आभार व्यक्त गर्नु भएको छ । समुद्र सतहबाट करिव ३ हजार २ सय मिटर उचाइमा रहेको ओलाङचुङगोला ऐतिहासिक स्थलको रुपमा परिचित छ ।
करिव ५ सय वर्ष पुरानो दिकी छ्योलिङ गुम्बा रहेको ओलाङचुङगोला पर्यटकीय क्षेत्रले पनि परिचित छ । ओलाङचुङगोलाबाट नेपाल–तिब्बत सीमा नाका टिपताला पुग्न करिव २५ किलोमिटर दूरी पार गर्नुपर्छ ।
प्रतिक्रिया