ताप्लेजुङ, पुस १६ गते । ताप्लेजुङको फक्ताङलुङ गाउँपालिका–२ खेजेनिमा जारी प्रथम मानाभारा गोल्ड कपको दोस्रो दिन आजबाट दुई खेल हुँदै छ । मानाभारा युथ स्पोर्टिङ क्लबको आयोजनामा सञ्चालन भएको प्रथम मानाभारा गोल्ड कपमा आजबाट क्वाटर फाइनल अन्तरगतका दुई खेल सञ्चालन हुने भएको हो ।
आज हुने पहिलो क्वाटरफाइनल खेलमा सिँवा स्पोर्टिङ क्लब लिङखिम र लालीगुराँस स्पोर्टिङ क्लब सुरुमखिमबिच प्रतिस्पर्धा हुँदै छ । यस्तै आज नै लिखु भुजी रामेछाप युथ क्लब र जनसेवा आर्दश स्पोर्टिङ क्लब ढुङगेसाँघु बिच प्रतिस्पर्धा हुने मानाभारा युथ स्पोर्टिङ क्लबका सचिव मौसम अन्छङ्बोले जानकारी दिनुभयो ।
हिजो भएको उद्घाटन खेलमा मानाभारा युथ स्पोर्टिङ क्लब र माछापोखरी हिटी क्लब चाँगे बिच प्रतिस्पर्धा भएको थियो । जसमा आयोजक मानाभारा युथ स्पोर्टिङ क्लबलाई टाइब्रेकरमा ५–३ गोलअन्तरले पराजित गर्दै चाँगे सेमिफाइनलमा प्रवेश गरेको छ ।
निर्धारित समयमा २–२ गोलको बराबरी भएपछि निर्णय टाइब्रेकरबाट लिइएको हो । आयोजकका कप्तान मनराज लिम्बूले खेलको ५१ औँ मिनेटमा गोल गर्दै अग्रता दिलाउनु भएको थियो । तर ५८ औँ मिनेटमा चाँगेका दिपेश श्रेष्ठले गोल गर्दै बराबरी गर्नुभयो । त्यस्तै पुन श्रेष्ठले ६० औँ मिनेटमा व्यक्तिगत दोस्रो गोल गर्दै खेललाई २–१ गोलअन्तरले पछि पार्दै अघि बढेको ४ मिनेटपछि आयोजकका विवेक लिम्बूले गोल गरेर बराबरीमा रोक्न सफल हुनु भएको थियो ।
यस्तै विहीबार अन्तिम क्वाटरफाइन खेलमा नव प्रयास युनाइटेड क्लब हाङ्देवा, प्रगतिशील युवा क्लब लिङ्तेपबिच भिडन्त हुने अन्छङबोको भनाई छ । प्रतियोगिताको विजेताले नगद ३ लाख २ हजार ८२ रुपियाँ सहित ट्रफी, मेडल र प्रमाण पत्र प्राप्त गर्ने छन् । यस्तै उपविजेतालाई नगद १ लाख ५२ हजार ८२ रुपियाँ सहित ट्रफी, मेडल र प्रमाण पत्रको व्यवस्था गरिएको छ ।
साथै विभिन्न विधामा सर्वोत्कृष्ट बन्ने खेलाडीलाई समेत उचित नगद पुरस्कारको व्यवस्था गरिएको आयोजकले जनाएको छ । स्थानीय स्तरमा उत्पादित प्रमुख नगदे बाली अलैँचीको प्रवर्द्धन साथै विश्वमा छरिएर रहनु भएका लिम्बू जातिको शिर उठाउने ठाउँ ‘नाहाङ्मा–यक’ र गडीडाँडाको संरक्षण तथा प्रचार प्रसारका लागि गोल्ड कपको आयोजना गरिएको क्लबका संरक्षक विकास साम्रा रविनले जानकारी दिनुभयो ।
खेजेनिमको आहाले टारमा सञ्चालन भइरहेको प्रतियोगिताको फाइनल खेल आगामी पुस १९ गते हुने छ ।
प्रतिक्रिया