ताप्लेजुङ, पुस १५ गते । प्रथम मानाभारा गोल्ड कप आजबाट सुरु हुँदै छ । ताप्लेजुङको फक्ताङलुङ गाउँपालिका–२ खेजेनिमा मानाभारा युथ स्पोर्टिङ क्लबको आयोजनामा प्रथम मानाभारा गोल्ड कप आजबाट सुरु हुने भएको हो ।
स्थानीय स्तरमा उत्पादित प्रमुख नगदे बाली अलैँचीको प्रवर्द्धन साथै विश्वमा छरिएर रहनु भएका लिम्बू जातिको शिर उठाउने ठाउँ ‘नाहाङ्मा–यक’ र गडीडाँडाको संरक्षण तथा प्रचार प्रसारका लागि गोल्ड कपको आयोजना गरिएको क्लबका संरक्षक विकास साम्रा रविनले जानकारी दिनुभयो । खेजेनिमको आहाले टारमा सञ्चालन हुने प्रतियोगितामा जम्मा आठ टिमको सहभागिता रहेको छ ।
आज हुने उद्घाटन खेलमा मानाभारा युथ स्पोर्टिङ क्लब र माछापोखरी हिटी क्लब चाँगे बिच प्रतिस्पर्धा हुने मानाभारा युथ स्पोर्टिङ क्लबका सचिव मौसम अन्छङ्बोले जानकारी दिनुभयो । उहाँका अनुसार बुधबार दोस्रो क्वाटरफाइनल खेलमा सिँवा स्पोर्टिङ क्लब लिङखिम र लालीगुराँस स्पोर्टिङ क्लब सुरुमखिमबिच प्रतिस्पर्धा हुँनेछ ।
यस्तै बुधबार नै तेस्रो क्वाटरफाइनल खेलमा लिखु भुजी रामेछाप युथ क्लब र जनसेवा आर्दश स्पोर्टिङ क्लब ढुङगेसाँघु बिच प्रतिस्पर्धा हुने छ भने विहीबार अन्तिम क्वाटरफाइन खेलमा नव प्रयास युनाइटेड क्लब हाङ्देवा, प्रगतिशील युवा क्लब लिङ्तेपबिच भिडन्त हुने अन्छङबोको भनाई छ ।
प्रतियोगिताको विजेताले नगद ३ लाख २ हजार ८२ रुपियाँ सहित ट्रफी, मेडल र प्रमाण पत्र प्राप्त गर्ने छन् । यस्तै उपविजेतालाई नगद १ लाख ५२ हजार ८२ रुपियाँ सहित ट्रफी, मेडल र प्रमाण पत्रको व्यवस्था गरिएको छ ।
साथै विभिन्न विधामा सर्वोत्कृष्ट बन्ने खेलाडीलाई समेत उचित नगद पुरस्कारको व्यवस्था गरिएको आयोजकले जनाएको छ ।
प्रतिक्रिया