ताप्लेजुङ, पुस १० गते । फुङलिङ नगरपालिका प्रमुख अमिर मादेनले एकअर्काको धर्मप्रति अपनत्व हुनेगरि सबै नागरिकलाई धार्मिक गतिविधि गर्न आग्रह गर्नुभएको छ । क्रिसमस डेको अवसरमा ख्रिस्टियन बत्तीस मण्डली फुङलिङ नगरपालिका–५ ले आयोजना गरेको शुभकामना आदानप्रदान कार्यक्रममा मादेनले एकले अर्को धर्मलाई होचोहेलो गर्न नहुनेमा जोड दिनुभयो ।
‘हामिले मान्ने विधि फरक हो, भगवान एउटै हुन्, त्यसैले तेरो धर्म यस्तो मेरो धर्म यस्तो नभनी सबैले सबैलाई मानेर बसौँ, त्यसले राम्रो गर्छ र गर्नु पर्ने पनि त्यहीनै हो’ मादेनले भन्नुभयो। बत्तीस मण्डलीको शुभकामना आदानप्रदान कार्यक्रममा मेरिङदेन गाउँपालिका अध्यक्ष युक हांबिर हाङगाम डम्बरले इसाई धर्माबलम्बीहरूको महान पर्वको अवसरमा देश तथा विदेशमा रहेका नेपाली दाजुभाइ दिदीबहिनीलाई सम्झिरहेको बताउनुभयो ।
फुङलिङ नगरपालिका ५ का वडाध्यक्ष सोजित श्रेष्ठ, काँग्रेस सभापति गजेन्द्र प्रसाद तुम्याहाङ, पाथीभरा बहुमुखी क्याम्पसमा अध्यक्ष शिला इजमले क्रिसमसको शुभकामना दिनुभएको थियो । बत्तीस मण्डलीका अध्यक्ष एवं पास्टर रुबेन एभेङका अनुसार जिल्लाभरनै बिहीबार आआफ्नो तरिकाले क्रिसमस डे मनाइएको छ ।
गाउँसहर परिवेश र समाज अनुसार आआफ्नै तरिकाले मनाएको र नगरपालिका केन्द्रीकृत कार्यक्रम आफूहरूले गरेको उहाँले बताउनुभयो ।
प्रतिक्रिया