सेसेलुङ महिला गोल्डकप : फक्ताङलुङलाई पराजित गर्दै फुङलिङ सेमिफाईनलमा प्रवेश

रेडियो काबेली
ताप्लेजुङ। फुङलिङ नगरपालिका ताप्लेजुङमा जारी कञ्चनजङ्घा सेसेलुङ महिला गोल्डकप फुटबल प्रतियोगिताको सेमिफाईनलमा प्रवेश गरेको छ । सोमबार भएको तेस्रो क्वाटर फाइनल खेलमा फक्ताङलुङ गाउँपालिकालाई ३–० गोल अन्तरले पराजित गर्दै फुङलिङ नगरपालिका सेमिफाईनलमा प्रवेश गरेको हो ।

खेलको ४५ औँ मिनेटमा फुङलिङ नगरपालिकाकी सम्झना लावतीले आफ्नो टिमलाई पहिलो गोल गर्दै अग्रता दिलाउनुभयो । त्यस्तै नगरपालिकाको तर्फबाट नै ४९ औँ मिनेटमा गोल गर्दै सुजता लिम्बुले अग्रतालाई दोब्बर बनाउनुभयो । त्यस्तै खेलको ५४ औँ मिनेटमा समिक्षा मगरले फुङलिङ नगरपालिकाको लागि तेस्रो गोल गर्नुभयो । फुङलिङ नगरपालिकाले अब सेमिफाईनलमा मैवाखोला गाउँपालिकासँगको भेट पक्का गरेको छ । आजको खेलको प्लेयर अफ द म्याच हुँदैै फुङलिङ नगरपालिकाकी सम्झना लावतीले नगद ५ हजारका साथमा ट्रफि प्राप्त गर्नुभयो ।

त्यस्तै मङ्गलबार मेरिङदेन गाउँपालिका र सिदिङवा गाउँपालिकाबिच प्रतिस्पर्धा हुँदै छ । प्रतियोगिताको विजेताले ट्रफीसहित दुई लाख दुई हजार ८२ रुपियाँ र उपविजेताले एक लाख दुई हजार ८२ रुपियाँसहित ट्रफी, मेडल र प्रमाण पत्र प्राप्त गर्नेछ ।
म्यान अफ द म्याच हुने खेलाडीलाई जनही पाँच हजार, विधागततर्फ उत्कृष्ट हुने सबै खेलाडीलाई जनही आठ हजार र सर्वोत्कृष्ट हुने खेलाडीलाई नगद १० हजार रुपियाँ पुरस्कारको पनि व्यवस्था गरिएको छ ।
चासोक तङनामको अवसरमा कञ्चनजङ्घा फुङलिङ क्लब र ङावरक सङजम्बो फुङलेङको आयोजनामा सञ्चालन भएको प्रतियोगिताको फाइनल खेल मङ्सिर २० गते हुने छ ।