फुङलिङ नगरपालिकाको सेवा अनिश्चितकालिन बन्द

ताप्लेजुङ । मंगलबार राति भएको तोडफोड आगजानी पछि फुङलिङ नगरपालिकाको सेवा अनिश्चितकालका लागि बन्द भएको छ । बुधबार विज्ञप्ती निकाल्दै नगरपालिकाले अर्को सुचना नभएसम्मको लागि नगरपालिकाबाट प्रदान हुने सम्पुर्ण सेवा बन्द रहने कुरा जनाएको हो ।
तोडफोड आगजानीले प्रशासनिक भवन तोडफोड र आगजानी पछि तहसनहस भएकोले सेवा प्रवाह गर्न सक्ने अवस्था नरहेको नगर प्रमुख अमिर मादनेद्धारा हस्ताक्षरित विज्ञप्तीमा जनाईएको छ । नगरपालिकाले सेवा प्रवाह बन्द हुँदा स्थानीयमा पर्ने असुविधाप्रति क्षमा याचना गरेको छ ।
मंगलबार राती नगरपालिकामा जनेनी समुहले तोडफोड गर्दा नगरपालिकाको प्रशासकिय भवन सहित, दुईवटा दमकल, एउटा टिप्पर र जेसिभी मेसिनमा क्षती पुग्नुका साथै कार्यालयका कागजात जलाईएको थियो भने फर्निचरमा समेत क्षती पुगेको थियो । आगलागीलाई भने नेपाली सेनाले नियन्त्रणमा लिएको थियो ।