ताप्लेजुङ । अन्तराष्ट्रिय आमन्त्रण तेस्रो ताप्लेजुङ गोल्डकपका लागि तेल्लोक स्पोर्टिङ क्लब ताप्लेजुङले दुई जना विदेशी खेलाडी अनुबन्धन गरेको छ । क्लबले नाइजेरियन खेलाडी शमूएल ओलुशुला अडेकुन्ले र आइभरी कोस्टीयन खेलाडी फोफोना ब्राहिमनलाई अनुबन्धन गरेको हो ।
उहाँहरूले ए डिभिजन लिग खुलिसक्नुभएको छ । तेल्लोक स्पोर्टीङ क्लबले यो वर्ष ताप्लेजुङ गोल्डकपमा जिल्लाको प्रतिनिधित्व गर्दै छ । आगामी साउन २४ गतेबाट सुरु हुने गोल्ड कपमा तेल्लोक स्पोर्टीङ क्लब सहित ८ टिमको सहभागिता हुँदै छ ।
जसमा अन्तराष्ट्रिय टोली लेजण्ड फुटबल एकेडेमी सिलिगुडी भारत, फिदिम स्पोर्टिङ क्लब पाँचथर, रेडस्टार फुटबल क्लब झापा, द योङ ब्रदर्स क्लब इटहरी सुनसरी, सहलेस युवा क्लब सिराहा, चर्च ब्वाइज क्लब काठमाडौँ, सहारा क्लब पोखरा सहभागी हुने भएका छन् ।
यस वर्ष गोल्डकपको पुरस्कार राशि वृद्धि भएको छ । प्रतियोगिताको विजेताले सात लाख दुई हजार ८२ र उपविजेताले तीन लाख ५० हजार ८२ रुपियाँ पुरस्कार पाउने लाखेजात्रा सञ्चालन समितिका कोषध्यक्ष दावा शेर्पाले बताउनुभयो । यसैगरी प्रतियोगिताका सर्वोत्कृष्ट खेलाडीले २० हजार रुपियाँ नगद पुरस्कारसहित ट्रफी, पदक र प्रमाणपत्र पाउनेछ ।
सर्वाधिक गोलकर्ता, उत्कृष्ट गोल रक्षकसहित विभिन्न विधामा छनोट हुने खेलाडीलाई जनही १५ हजार रुपियाँ नगद पुरस्कारसहित ट्रफी, पदक र प्रमाणपत्र प्राप्त गर्ने छन् ।
यस्तै उत्कृष्ट खेलाडीले यामाहाको बाइक समेत प्राप्त गर्ने आयोजकको भनाई छ ।
प्रतिक्रिया