रेडियो काबेली । अल्लोलाई ब्राण्डीङ गर्न ताप्लेजुङको मैवाखोला गाउँपालिका लागिपरेको छ । गाउँपालिका विगत तीन आर्थिक वर्ष यताबाट अल्लोलाई ब्राण्डीङ गर्न लागि परेको हो ।
गाउँपालिका अध्यक्ष विजय प्रकाश वनेमका अनुसार स्थानीय स्तरमा पाउने कच्चा पदार्थको सदुपयोग गर्दै महिला तथा आर्थिक अवस्था कमजोर भएका स्थानीयलाई आर्थिकरूपमा आत्मनिर्भर बनाउने उद्देश्यका साथ पालिका अल्लो ब्रान्डिङमा लागेको हो । यो अभियान अहिले जङ्गलको भाङ्ग्रे सिस्नुलाई धागो बनाएर कपडा तयार गर्न सक्ने सम्म पुगेको अध्यक्ष वनेमको भनाई छ ।
गाउँपालिकाले दरखास्त आह्वान गरेर सबै वडाको प्रतिनिधित्व हुने गरि आर्थिक वर्ष २०७९/८० मा अल्लोबाट धागो बनाउने तालिम प्रदान गरेको थियो । यस्तै गत आर्थिक वर्ष (२०८०/८१) मा अल्लोको धागोबाट कपडा बुन्ने तालिम प्रदान गरेको थियो ।
त्यस्तै चालु आर्थिक वर्षमा भने अल्लोको धागोबाट कपडा तयार गर्ने र विभिन्न डिजाइनका सामग्रीहरू तयार गर्न सक्ने तालिम प्रदान गरेको छ । तालिम गाउँपालिका प्रत्येक वडाबाट प्रतिनिधि हुने गरि नौ जना महिला र एक जना पुरुष गरि जम्मा १० जनालाई तालिम प्रदान गरेको छ ।
तालिम सँगै तालिम दिएका दशैँ जनालाई एक एक वटा सिलाई बुनाई गर्ने मेसिन पनि हस्तान्तरण गरेको पालिका अध्यक्ष वनेमको भनाई छ । उहाँका अनुसार गुणस्तरीय सामाग्री उत्पादन गर्नका लागि यसपछि उक्त तालिम लिएकाहरूलाई पुर्नताजकी तालिम प्रदान गरिने छ ।
साथै उत्पादित सामग्रीहरूलाई बजारीकरणका लागि गाउँपालिकाले सहयोग गर्ने जनाएको छ ।
प्रतिक्रिया