ताप्लेजुङ । ताप्लेजुङमा बुढ्यौलीको सङ्ख्या बढेको छ । तथ्याङ्क समन्वय कार्यालय इलामले सार्वजनिक गरेको तथ्याङ्क अनुसार बुढ्यौलीको सङ्ख्या बढेको हो ।
मङ्गलबार ताप्लेजुङको सदरमुकाम फुङ्लिङमा तथ्याङ्क साक्षरता तथा क्षमता अभिवृद्धि सम्बन्धी एक दिने अन्तरक्रियात्मक गोष्ठीको आयोजना गरी तथ्याङ्क प्रस्तुत गरिएको थियो । वि.संं २०७८ को जनगणना अनुसार ताप्लेजुङमा १०.२ प्रतिशत बुढ्यौलीको सङ्ख्या रहेको तथ्याङ्क अधिकृत किरण कुमार राईले प्रस्तुत गर्नुभएको तथ्याङ्कमा उल्लेख गरिएको छ ।
उक्त सङ्ख्या वि.सं. २०६८ सालको जनगणना अनुसार दुई प्रतिशतले बढेको छ । ६८ सालको जनगणनामा ताप्लेजुङमा ८.१ प्रतिशत बुढ्यौली रहेका थिए । यस्तै सङ्ख्यामा बुढ्यौली वृद्धि हुने हो भने हेरचाह, आवास, व्यवस्था, सामाजिक सुरक्षा र आर्थिक भरणपोषरणमा चुनौती सिर्जना हुने राईको भनाई छ ।
वि. सं. २०७८ सालको जनगणना अनुसार ताप्लेजुङको कुल जनसङ्ख्या एक लाख २० हजार ९० जना रहेको छ । यस अघि राष्ट्रिय तथ्याङ्क कार्यालयले राष्ट्रिय जनगणना २०७८ को विषयगत प्रतिवेदन मध्ये नेपालमा बुढ्यौलीको अवस्थासम्बन्धी प्रतिवेदनले नेपालको जनसङ्ख्या तीव्र रूपले बुढ्यौलीतर्फ प्रवेश गरेको देखाएको थियो ।
सोही अनुसार घट्दो जन्मदर र मृत्युदरले वि.सं. २१११ मा नेपाल एक बुढ्यौली समाजमा रूपान्तरण हुने अनुमान गरिएको छ । जसले गर्दा राज्यलाई विषेश चुनौती सिर्जना हुने देखिन्छ ।
प्रतिक्रिया