पाथिभरा मन्दिरमा एकै दिन साढे पाँच हजार भक्तजनले गरे पुजा

ताप्लेजुङ । प्रसिद्ध तीर्थस्थल पाथिभरा मन्दिरमा एकै दिन साढे पाँच हजार भक्तजन पुगेका छन् । शनिबार एकै दिन पाँच हजार ५७७ जना भक्तजन पाथिभरा मन्दिर पुगेका हुन् ।

सिजन लागे सँगै पाथिभरा मन्दिरमा आउनुहुने भक्तजनहरूको सङ्ख्यामा उल्लेख्य वृद्धि भएको पाथिभरा क्षेत्र विकास समितिका कर्मचारी राजेन्द्र महतले बताउँनुभयो । उहाँका अनुसार आज बिहान तीन बजेदेखि भक्तजनहरूलाई लाइन लगाएर पुजा गराइएको थियो । दिउसो तीन बजे मात्र उक्त पूजाको लाइन सकिएको महतको भनाई छ ।

यस अघि चैत्र २३ गते शनिबार एकैदिन सात हजार १४६ जना भक्तजनले पाथिभरा मन्दीको दर्शन गरेका थिए । उक्त दिन दशैँ तिहार पछि सबैभन्दा धेरै दर्शनार्थी पाथिभरा मन्दिर पुगेको पाथिभरा क्षेत्र विकास समितिका कार्यकारी निर्देशक प्रजिन हाङबाङले बताउनुभयो ।

पछिल्लो समय केबुलकार विवादका कारण बन्द हड्ताल भएकाले पाथिभरा मन्दिर आउने दर्शनार्थीको सङ्ख्या कम हुँदै गएको थियो । यस अघि फागुन महिनामा सात हजार ४२८ दर्शनार्थी पाथीभरा मन्दिर पुगेका थिए ।

यस्तै माघ महिनामा भने चार हजार २४९ दर्शनार्थीले मात्र मन्दिरको दर्शन गरेका थिए । यता पाथीभरा दर्शन गर्न आउने तीर्थयात्रीले ताप्लेजुङ सदरमुकाम फुङलिङ बजार, काफ्ले पाटी र माथिल्लो फेदीको होटलहरू भरिभराउ भएको छ । यो सँगै होटल व्यवसायीहरूलाई राहत मिलेको छ ।

पूजाको लागि पालो कुर्दै लाइनमा भक्तजन । तस्विर सौजन्य : पाथिभरा क्षेत्र विकास समितिका कर्मचारी राजेन्द्र महत ।