ताप्लेजुङ । करिब चार महिनापछि ताप्लेजुङमा हवाई उडान सुरु भएको छ । गत मंसिर २८ गते देखि बन्द रहेको ताप्लेजुङको सुकेटार बिमास्थलमा आज (आइतबार) बाट हवाइ उडान सुरु भएको हो ।
नेपाल वायु सेवा निगमको जहाजले आजबाट काठमाडौँ–ताप्लेजुङ–काठमाडौँ उडान सुरु गरेको छ । शुक्रबार तालिका तय भएपनि प्राविधिक समस्याका कारण आइतबारका लागि उडान सारिएको थियो । काठमाडौँबाट ५ जना यात्रु लिएर आएको नेपाल वायु सेवा निगम ताप्लेजुङका कर्मचारी कुमार गुरुङले जानकारी दिनुभयो । उहाँका अनुसार ताप्लेजुङबाट पुरुष ४ र महिला २ जना गरि जम्मा ६ जना काठमाडौँ प्रस्थान गरेका छन् ।
गत चैत १६ गते शनिबारदेखि उडान गर्ने तालिका अनुसार जहाज आएपनि अवतरण हुन नसकेपछि जहाज पुन काठमाडौँ फर्किएको थियो । जसका कारण १० जना यात्रु लिएर आएको जहाज भिजिबिलिटी कम भएकाले अवतरण हुन सकेको थिएन । सो उडान सफल हुन नसक्दा ताप्लेजुङबाट उपचारका लागि काठमाडौँबाट हिँडेका ४ जना यात्रु प्रभावित भएका थिए ।
नेपाल वायु सेवा निगमको दुई वटा जहाज ग्राउण्डेड भएपछि चार महिनादेखि हवाई उडान ठप्प भएको थियो । तत्कालका लागि हाल सातामा एक दिन मात्रै उडान तय भएको थियो । आगामी उडान तालिका तत्काल आई नसकेको निगमले जनाएको छ । सातामा एक दिनमा उडान तालिका राख्दै आएको र बैशाखपछि थप गरिने तयारीमा रहेको बताइएको छ ।
मौसमका कारण पटक–पटक जहाज अवतरण हुन नसक्दा आवतजावत गर्ने यात्रुको सङ्ख्यामा कमी भएको निगमले उल्लेख गरेको छ । अवतरण अनिश्चित बन्दा यात्रुको सङ्ख्यामा कमी आउने गरेको छ ।
प्रतिक्रिया