ताप्लेजुङ । ताप्लेजुङको मिक्वाखोला गाउँपालिका वडा नं. २ खोक्लिङमा शुक्रबारबाट उद्घोषण तथा भाषणकला सम्बन्धी तीन दिने पुर्नताजकी तालिम सुरु भएको छ । मिक्वाखोला गाउँपालिका र पालिकाको वडा नं. २ को आर्थिक सहयोगमा सगरमाथा महिला विकास समितिले तालिमको आयोजना गरेको हो ।
तालिमको उद्घाटन गर्दै मिक्वाखोला गाउँपालिका वडा नं. २ का वडाध्यक्ष झरेन्द्र प्रसाद थापाले यसअघि प्राप्त ज्ञान सीपको सरलीकरणका लागि तालिमले ठूलो सहयोग पुऱ्याउने बताउनुभयो । कार्यक्रममा मिक्वाखोला गाउँपालिका वडा नं. २ का वडा सचिव गुणराज सिग्देलले मानव जीवनमा अति उपयोगी ठानिएको तालिमबाट प्राप्त सीपको उचित उपयोगमा सहभागीले प्रभावकारी ध्यान दिने बताउनुभयो ।
कार्यक्रममा आयोजक सगरमाथा महिला विकास समितिका उपाध्यक्ष तारादेवी बस्नेत थापा तथा सचिव बिष्णुमाया राई (बिपना बियोगी) ले तालिमको महत्व र आयोजनाको उद्देश्य माथि प्रकाश पार्नु भएको थियो । तालिमको सहजीकरण पत्रकार महासङ्घ ताप्लेजुङका पूर्व अध्यक्ष तथा उज्यालो पोष्ट दैनिकका सम्पादक खगेन्द्र अधिकारीले सहजीकरण गर्नुहुने आयोजक सगरमाथा महिला विकास समितिले जनाएको छ ।
प्रतिक्रिया