ताप्लेजुङ । ताप्लेजुङको फक्ताङ्लुङ गाउँपालिकामा च्याउ खेती सम्बन्धी दुई दिने तालिम सम्पन्न भएको छ । स्थानीय स्तरको स्रोत साधनलाई प्रयोग गरी कृषकहरूलाई सबल बनाउने उद्देश्यका साथ तालिम सम्पन्न भएको हो ।
स्थानीय सरकारको वित्तिय समानीकरण अन्तरगत उक्त तालिम सञ्चालन गरिएको गाउँपालिका अध्यक्ष राजन लिम्बू (मुक्ति)ले बताउँनुभयो । उहाँका अनुसार तालिमलाई दुई चरणमा विभाजन गरिएको र पहिलो चरणको तालिम सम्पन्न भएको हो ।
पहिलो चरणको तालिमा वडा नं. ४ इखाबु, वडा नं. ५ तापेथोक र वडा नं. ६ लेलेपका कृषकहरूलाई समावेश गरिएको छ । कृषि ज्ञान केन्द्र छिरुवामा मङ्गलबार र बुधबार सञ्चालन भएको दुई दिने तालिमा १६ जना कृषकहरूको सहभागिता रहेको तालिम संयोजक तथा नायब प्राविधिक सहायक ओम प्रकाश शर्माले जानकारी दिनुभयो ।
बाँकी वडा नं. १ सावादिन, वडा नं. २ खेजेनीम र वडा नं. ३ लिङ्खिमका कृषकहरूलाई चाँडै नै दोस्रो चरणको तालिम दिने शर्माको भनाई छ । चालु आर्थिक वर्षमा उक्त तालिमको लागि एक लाख १० हजार रुपियाँ बजेट विनियोजन भएको र यसै बजेट मार्फत तालिम सञ्चालन गरिएको पालिकाले जनाएको छ ।
फक्ताङलुङ गाउँपालिकाले कृषि क्षेत्रको आमूल परिवर्तनका लागि कृषि ज्ञान केन्द्र समेत स्थापना गरेको छ । यो सँगै यस अघि पनि सुन्तला खेती सम्बन्धी तालिम सञ्चालन गरि सकेको छ ।
प्रतिक्रिया