एलिना दियाली
ताप्लेजुङ । विगत ५१ वर्षदेखी ताप्लेजुङको दोभान बजारमा लाग्दै आएको पुसे मेला मंगलबारबाट सुरु भएको छ । पौष १ गत सामेबारदेखी नै मेला सुरु गर्ने भनिएता पनि भलिबल खेलाडीहरु नआईपुगेका कारण मंगलबारबाट मेलासँगै भलिबल प्रतियोगिता सुरु गरिएको आयोजक पुसे मेला सञ्चालन समितीले जनाएको छ ।
मंगलबार भएको उद्धघाटन खेलमा गत वर्षको विजेता समेत रहेको पाथीभरा टाईगर भलिबल क्लब (पिटीभिसी) झापा विजयी भएको छ । राष्ट्रिय रेफ्रि दिवस चोङबाङका अनुसार पिटीभिसीले हिमाली तोक्पेगोला युथ क्लब ताप्लेजुङलाई ३–० को सोझो सेटमा पराजित गर्दै विजयी सुरुवात गरेको हो । पिटीभिसी २५–१९, २६–२४, २५–२१ को सेटमा विजयी भएको हो ।
त्यस्तै मंगलबार नै भएको दोस्रो खेलमा भोजपुर भलिबल क्लब विजयी भएको छ । नाम्चे भलिबल क्लब सिक्किमलाई ३–२ को सेटमा पराजित गर्दै भोजपुर विजयी भएको हो । भोजपुर २२–२५, २५–२३, २५–१०, १२–२५ र १२–१५ को सेटमा विजयी भएको हो ।
त्यस्तै मंगलबार नै भएको तेस्रो खेलामा मुकेश मेमोरियल भलिबल क्लब (एमएमसी) ताप्लेजुङ विजयी भएको छ । पाँचथर भलिबल संघलाई ३–१ को सेटमा पराजित गर्दै एमएमसी विजयी भएको हो । एमएमसी १४–२५,१७–२५,२५–२२, १४–२५ को सेटमा विजयी भएको हो ।
प्रतियोगिता अन्तरगत बुधबार पहिलो खेल बिहान ८ बजे हिमाली तोक्पेगोल युथ भलिबल क्लब ताप्लेजुङ र भोजपुर भलिबल क्लब,भोजपुर बिच हुनेछ भने दोस्रो खेल बिहान १० बजे पाथीभरा टाईगर भलिबल क्लब (पिटीभिसी) झापा र नाम्चे भलिबल क्लब सिक्किम बिच हुनेछ भने मुकेश मेमोरियल भलिबल क्लब (एमएमसी) ताप्लेजुङ र सभापोखरी भलिबल क्लब, सङखुवासभा बिच मध्यान्न १२ बजे हुने बतार्ईएको छ ।
अन्तर्राष्ट्रिय आमन्त्रण तथा अन्तर जिल्लास्तरीय पुरुष भलिबल प्रतियोगिताको विजेताले नगद ३ लाख र उपविजेताले नगद १ लाख ७५ हजार रुपैँया सहित ट्रफि, मेडल र प्रमाणपत्र प्राप्त गर्नेछ । यस्तै मेलामा ब्याडमिन्टन प्रतियोगिता, साइकलिङ, ¥याफ्टिङलगायतका गतिविधि हुने आयोजकले जनाएको छ ।
प्रतिक्रिया