ताप्लेजुङ । ताप्लेजुङको फुङलिङमा जारी कञ्चनजंघा सेसेलुङ गोल्ड कपमा आज इलाम र झापाबीच प्रतिष्पर्धा हुँदैछ । दोश्रो अन्तराष्ट्रिय आमन्त्रण कपको फाइनल प्रवेशका लागि झापाको न्यु स्टार क्लब बिर्तामोड र इलामको रेड डेभिल्स मजोमाईबीच प्रतिस्पर्धा हुने भएको हो ।
झापाले क्वार्टरफाईनलमा पाँचथरलाई २–१ र इलामले मोरङलाई ४–२ गोलअन्तरले पराजित गर्दै सेमिफाइनलको यात्रा तय गरेका हुन् । आजको विजेताले उपाधिका लागि सुनसरीको गोधूली फुटबल क्लब धरानसँग प्रतिष्पर्धा गर्नुपर्नेछ ।
सुनसरीले हिजो सम्पन्न भएको पहिलो सेमिफाइनल खेलबाट तेह्रथुमको सम्दु फुटबल क्लबलाई ट्राइबेकरमा ४–२ गोलअन्तरले पराजित गर्दै फाइनलमा स्थान सुरक्षित गरेको छ । निर्धारित समयमा दुवैटीमले ४–४ गोलको बराबरी खेलेसँगै खेलको नतिजा ट्राइबेकर मार्फत प्राप्त भएको थियो ।
प्रतियोगिताको विजेता र उपविजेताले क्रमश नगद ३ लाख २ हजार ८१ रुपैयाँ र १ लाख ५२ हजार ८१ रुपैयाँ सहित ट्रफी, मेडल र प्रमाण–पत्र प्राप्त गर्नेछन् । प्रतियोगिताको फाइनल मंसिर २२ गते (शनिबार) हुनेछ । चासोक तङनाम सञ्चालन समिति, ङावोरक सङजुम्भो फुङलेङ र कञ्चनजंघा फुङलिङ क्लबको संयुक्त आयोजनामा प्रतियोगिता सञ्चालन भएको हो ।
प्रतिक्रिया