साहारा लङ्वा लिम्बू
ताप्लेजुङ । मेरिङ्देन गाउँपालिकाले कोशी प्रदेश उद्योग, कृषि तथा सहकारी मन्त्री माननीय खगेन सिं हाङगाम समक्ष विभिन्न कार्यक्रमको माग राखेको छ । पालिकाले आज मन्त्री हाङ्गामलाई बधाई तथा शुभकामना कार्यक्रमको आयोजना गरि विभिन्न ९ वटा योजना तथा कार्यक्रमको लागि माग राखेको हो ।
कार्यक्रममा पालिकाले आर्थिक वर्ष ८०/०८१ मा सम्पादन गरेका र चालू आर्थिक वर्ष ८१/०८२ मा हुँदै गरेका योजना तथा कार्यक्रमहरूको बारेमा जानकारी दिदैँ मन्त्री समक्ष प्रदेश सरकारलाई उक्त योजनाको माग राखेको पालिका अध्यक्ष युक हाङ् विर हाङ्गाम डम्बरले जानकारी दिनुभयो ।
योजना तथा कार्यक्रमहरूमा दोभान बजार देखि प्रशासकीय भवन सम्म कालो पत्रे, सडक निर्माणको लागि बजेटको सुनिश्चितता, हिमाली लोकमार्गको निरन्तरता, मेवाथुम सडक निर्माणको लागि बजेटको सुनिश्चितता रहेको छ ।
यस्तै, महासिरेङ माङ्गेना यकको संरक्षण सम्वर्द्धन साथै आवश्यक पूर्वाधार निर्माण, गाउँपालिका स्तरीय सामुदायिक भवन निर्माण र गाउँपालिका स्तरीय चिस्यान केन्द्र (कोल्ड सेन्टर) निर्माणका लागि बजेट सुनिश्चितता गर्न माग गरिएको पालिकाले जनाएको छ ।
अलैँची, किवी, कफी, र जैविक मल प्रवर्द्धन कार्यक्रम, मेरिङदेन गाउँपालिकामा भेटनरी ल्याब स्थापना र घरपालुवा पशुहरूमा कृतिमा गर्भाधान कार्यक्रम सञ्चालनका लागि माग राखिएको छ ।
साथै मन्त्री हाङ्गामले रैथाने बालिको संरक्षण तथा सम्वर्द्धन, कफी खेतीको सम्भाव्यता, गाउँपालिकाले विविध योजनाहरू माग गर्दा सम्भाव्यता अध्ययन गरेर दिगो निरन्तरता र जनताको जनजिविका सित प्रत्यक्ष सरोकार राख्ने योजना तथा कार्यक्रम हुनुपर्नेमा जोड दिएका छन् ।
प्रदेश सरकारद्वारा सम्पादन भइरहेका योजनाहरूमा श्रोत तथा बजेटको सुनिश्चितता बारेमा समेत मन्त्री हाङ्गामले प्रतिबद्धता व्यक्त गर्नुभएको छ ।
प्रतिक्रिया