कार्तिकमा ६१ हजार बढीले पाथीभराको दर्शन गरे

रेडियो काबेली
ताप्लेजुङ । नवरात्रको समय सुनसान जस्तै बनेको प्रसिद्ध धार्मिकस्थल पाथीभराको कार्तिक महिनामा ६१ हजार बढी दर्शनार्थीले दर्शन गर्न गरेका छन् । पाथीभरा क्षेत्र विकास समितीले दिएको जानकारी अनुसार कार्तिक महिनामा ६१ हजार १ सय ७३ जना दर्शनार्थीले दर्शन गरेका हुन् । गत असोज १० गतेदेखी आएको अविरल वर्षापछिको बाढी र पहिरोले मेचिराजमार्ग र तमोर करिडोर अवरुद्ध हुँदा पाथीभराको दर्शन गर्ने मुख्य सिजनमा मन्दिर सुनसान बनेको थियो । तर मेचिराजमार्ग र तमोर करिडोर दुबै सञ्चालनमा आएपछि दर्शनार्थीको घुँईचो लागेको पाथीभरा क्षेत्र विकास समितीका कार्यकारी निर्देशक प्रजिन हाङबाङले जानकारी दिनुभयो ।

३ हजार ७ सय ९४ मिटर उचाईमा रहेको पाथीभरामा आफुले मागेको कुरा प्राप्त हुने जनविश्वास रहेकाले दर्शन गर्न देशका विभिन्न ठाउँ सहित भारत साथै अन्य देशबाट पनि दर्शनार्थी आउने गर्दछन् ।