साहारा लङ्वा लिम्बू
ताप्लेजुङ । अन्तराष्ट्रिय आमन्त्रण ताप्लेजुङ गोल्ड कपको आज अन्तिम सेमिफाइनल खेलको दिन ३ लाख ४४ हजार रुपैयाँको टिकट बिक्री भएको छ । आज भएको सिराहाको सलहेश युवा क्लब र झापाको बिर्तामोड फुटबल क्लब बिच भएको पहिलो सेमिफाइनल खेलमा १ हजार ७२० जना दर्शकले टिकट खरिद गरेको हो ।
भदौ ३ गते सोमबार देखि जारी रहेको प्रतियोगितामा पहिलो सेमिफाइनलको दिन ३ लाख ८ हजार ८०० रुपैयाँको टिकट बिक्री भएको थियो । यस्तै पहिलो दिन २ लाख २० हजार, दोश्रो दिन मङ्गलबार १ लाख ३५ हजार रुपैयाँ, तेस्रो दिन बुधबार १ लाख ४० हजार ८ रुपैयाँ र चौथो दिन बिहीबार २ लाख १३ हजार ९ सय रुपैयाँको टिकट बिक्री भएको कोषाध्यक्ष निरोज श्रेष्ठले जानकारी दिनुभयो ।
हरेक दिन टिकटबाट सङ्कलन भएको रकम खेल समापन हुन साथ समितिले सार्वजनिक गर्दै आइरहेको छ । टिकट काटेर खेल हेर्न आउने दर्शकका लागि समितिले बिभिन्न ३ ओटा अफरहरू समेत प्रदान गरेको छ । दर्शकका लागि क्वार्टरफाईनलमा एक सय, सेमिफाइनलमा २ सय र फाइनलका लागि २ सय ५० रुपैयाँ टिकट दर निर्धारण गरेको हो ।
आज भएको अन्तिम सेमिफाइनल खेलमा ट्राइबेकरमा ४-३ गोल अन्तरले झापाको बिर्तामोड फुटबल क्लब पराजित गर्दै सिराहा फाइनलमा प्रवेश गरेको छ । यो सँगै भदौ १० गते हुने फाइनल खेलमा मोरङको सगरमाथा युथ क्लब सँग भेट पक्का गरेको छ ।
झापाले त्रिभुवन आर्मीलाई र सिरहाले पाँचथरलाई पराजित गर्दै सेमिफाइनलमा प्रवेश गरेको हो । हिजो भएको पहिलो सेमिफाइनल खेलमा ताप्लेजुङको संघर्ष स्पोर्टिङ युवा क्लबलाई २–१ ले पराजित गर्दै मोरङ फाइनलमा प्रवेश गरेको हो ।
भदौ १० गते हुने फाइनल प्रतियोगिताको विजेताले ५ लाख र उपविजेताले २ लाख ५० हजार ५ सय ५५ रुपैयाँ सहित ट्रफी, मेडल र प्रमाण पत्र प्राप्त गर्ने छन् ।
प्रतिक्रिया