ताप्लेजुङ । अन्तर्राष्ट्रिय आमन्त्रण ताप्लेजुङ गोल्ड कपको दोश्रो संस्करणमा हरेक दिन एक जनालाई फ्यान अफ द म्याच छनोट गरिने भएको छ । यस वर्षको गोल्डकपदेखि ताप्लेजुङको खेल जगतमा नौलो अभ्यासको सुरुवात गरिए अनुसार हरेक दिन उपस्थित हुने हजारौँ दर्शकमध्येबाट १ जनालाई फ्यान अफ द म्याच छनोट गरिने भएको हो ।
लाखेजात्रा सञ्चालन समिति ताप्लेजुङद्वारा लाखेजात्रा पर्वको अवसरमा आयोजित खेलमा फ्यान अफ द म्याच छनोट भएकालाई राष्ट्रिय फुटबल टिमका कप्तान तथा गोलरक्षक किरण चेम्जोङद्वारा हस्ताक्षरित बल प्रदान गर्ने समितिले जनाएको छ । दर्शकले प्राप्त गर्ने त्यो उपहार अमूल्य हुनेमा आयोजक परिवार ढुक्क रहेको बताइएको छ ।
क्वार्टरफाईनलका ४ ओटा खेल, सेमिफाइनलको २ खेल र फाइनलको १ खेल गरि टिकट काटेर मैदानमा प्रवेश गरेका हजारौँ दर्शकमध्येबाट हरेक दिन एक जनाका दरले ७ जनालाई फ्यान अफ द म्याच छनोट गरि उपहार प्रदान गरिने अध्यक्ष देवराज गुरुङले बताउनुभयो ।
बिहीबार कप्तान तथा गोलरक्षक चेम्जोङ र अध्यक्ष गुरुङबीच भेटवार्ता भएको छ । भेटका क्रममा ताप्लेजुङ गोल्ड कपसँग सम्बन्धित विषयमा छलफल भएको अध्यक्ष गुरुङले जानकारी दिनुभयो । सोही अवसरमा फ्यान अफ द म्याचले प्राप्त गर्ने बलमा कप्तान तथा गोलरक्षक चेम्जोङले हस्ताक्षर गरि अध्यक्ष गुरुङलाई बुझाउनु भएको छ ।
उहाँले ताप्लेजुङ गोल्डकपको लोकप्रियता र क्रेजको चर्चा आफूले सुनेको बताउनुभएको अध्यक्ष गुरुङको भनाई थियो । गोल्डकपसँग जोडिन पाएकोमा आयोजकको प्रशंसा गर्दै उहाँले जोखिमपूर्ण समयमा फुटबलको क्रेज कायम राख्न गरेको संघर्ष प्रति विशेष धन्यबाद समेत दिनुभयो । अध्यक्ष गुरुङले नेपाली फुटबलमा उहाँले पु¥याउनु भएको योगदानप्रति सम्मान प्रकट गर्दै समस्त जिल्लावासीको तर्फबाट अझ सफलताको शुभकामना व्यक्त गर्नुभएको थियो ।
हाल इन्डियन सुपर लिगमा पञ्जाब एफसीमा अनुबन्धित कप्तान चेम्जोङले माल्दिभ्सको धिवेही प्रिमियर लिगमा टीसी स्पोर्ट्स र माजिया एस एण्ड आरसीलाई बिजयी बनाउनुभयो । स्वदेशी टीम थ्रि स्टारलाई नेपालको ए डिभिजन लिगको च्याम्पियन समेत बनाउन सफल हुनु भयो । उहाँले नेपाल, भारत र माल्दिभ्सको लिगको उपाधि समेत दिलाउनुभयो ।
प्रतिक्रिया