साहारा लङ्वा लिम्बू
ताप्लेजुङ । अपाङ्गता रोकथाम तथा पुनःस्थापना कार्यक्रम सञ्चालनका लागि मेरिङ्देन गाउँपालिकाले कोशी प्रदेश सरकार सामाजिक विकास मन्त्रालय र करुणा फाउन्डेसन नेपाल सँग साझेदारी गर्ने भएको छ । आज एक कार्यक्रमको बिच गाउँपालिका र कोशी प्रदेश सरकार सामाजिक विकास मन्त्रालय सँगै करुणा फाउन्डेसन नेपाल बिच त्रिपक्षीय सम्झौता भएको हो ।
अपाङ्गता रोकथाम तथा पुनःस्थापना कार्यक्रम सञ्चालन गर्न आगामी दुई आर्थिक वर्षको लागि गाउँपालिकाले १५ लाख रुपैयाँ छुट्याउने छ भने त्यसको दोब्बर कोशी प्रदेश सरकार सामाजिक विकास मन्त्रालय र करुणा फाउन्डेसन नेपालले दिने गाउँपालिका अध्यक्ष युक हाङ बिर हाङ्गाम डम्बरले जानकारी दिनुभएको छ ।
सम्झौता कार्यक्रममा करुणा फाउन्डेसन नेपालका वरिष्ठ कार्यक्रम व्यवस्थापक रूपा सिवाकोटी, ताप्लेजुङ जिल्ला संयोजक केदार भण्डारी र मेरिङदेन गाउँपालिका संयोजक प्रदिप कुमार जोशीको उपस्थिति रहेको मेरिङदेन गाउँपालिका सूचना अधिकारी जितेन लिम्बूले जानकारी दिनु भएको छ ।
उक्त सम्झौतालाई निरन्तरता दिने गाउँपालिका अध्यक्ष हाङ्गामले प्रतिवद्धता जनाउनुभएको छ । सम्झौता अवधि ३ वर्ष रहने उहाँको भनाई छ ।
प्रतिक्रिया