ताप्लेजुङमा थपिए ९ महिनामा ५१ उद्योग

ताप्लेजुङ । चालू आर्थिक बर्ष २०८०/८१ को ९ महिना भित्रमा ताप्लेजुङमा ५१ उद्योग थपिएका छन् ।

घरेलु तथा साना उद्योग कार्यालय ताप्लेजुङका अनुसार यो सहित ताप्लेजुङमा दर्ता भएका कूल उद्योगको संख्या २ हजार १ सय ८२ पुगेको छ । कार्यालयका सूचना अधिकारी तथा उद्यम विकास सहजकर्ता नवीन भट्टराईका अनुसार चालू आवमा सबैभन्दा बढी कृषि तथा वन पैदावारमा आधारित उद्योग थपिएका छन् ।

यो प्रकृतिका २८ वटा उद्योग दर्ता हुँदा पूर्वाधारका ९ वटा, पर्यटन र सेवामुलक ५–५ वटा र उत्पादनमूलक ४ वटा उद्योग दर्ता भएको भट्टराईले जानकारी दिनुभयो ।

यस आवमा खनिज,सूचना तथा सञ्चार प्रविधि र सूचना प्रसारण प्रविधिमा आधारित उद्योग दर्ता नभएको समेत घरेलु तथा साना उद्योग कार्यालयले जनाएको छ । यस्तै चालू आवमा ९१ वटा उद्योगको नविकरण भएकोे छ भने ७ वटाको नामसारी र दुईवटाको ठाउँसारी भएको छ । ४ वटा उद्योगको उद्देश्य थप सहितको अद्यावधिक हुँदा ४ वटा उद्योगको लगत कट्टा गरिएको छ ।

१० वटा उद्योगको प्रतिलिपि जारी भएको छ भने ४ वटा उद्योगको पुँजी बृद्धि र ४ वटाको नाम परिवर्तन भएको घरेलु कार्यालयले जनाएको छ । चालू आवको ९ महिने अवधिमा कार्यालयले १ सय ५ वटा उद्योगको निरीक्षण गरेको समेत जनाएको छ ।

यता वाणिज्य प्रशासनतर्फ २५ वटा फर्म दर्ता तथा ४६ वटाको नविकरण भएको छ । ३ वटा उद्योगको उद्देश्य थप हुँदा २ वटाको पुँजी बृद्धि भएको छ । वाणिज्य प्रशासनतर्फ एक उद्योगको नामसारी गरिएको छ भने ७ वटा उद्योगको प्रतिलिपि जारी भएको छ । eujyalopost.com