ताप्लेजुङ । ‘तेश्रो सिरिजङ्गा गोल्ड कप’को उपाधि देउराली स्पोर्टीङ क्लब इलामले हात पारेको छ । ताप्लेजुङको तेल्लोकमा आज भएको फाइनल खेलमा न्यू स्टार झापालाई २-० ले पछि पार्दै देउराली स्पोर्टीङ क्लबले उपाधि हात पारेको हो ।
जित सँगै देउराली स्पोर्टीङ क्लब इलामले नगद रु २ लाख २ हजार २ सय २२ रुपैयाँ सहित ट्रफी, मेडल प्रमाण पत्र प्राप्त गरेको छ । यस्तै न्यु स्टार क्लब झापाले भने १ लाख १ हजार १ सय ११ रुपैयाँमा चित्त बुझाउनु परेको आयोजक तेल्लोक स्पोर्टिङ क्लबले जनाएको छ ।
हिजो सम्पन्न भएको अन्तिम सेमिफाइनल खेलमा सुनाकोटी सिटी एफसी काठमाडौँलाई १–० गोल अन्तरले पराजित गर्दै ईलाम फाइनलमा प्रवेश गरेको हो । झापाले बुधबार ब्रोदरहुड फुटबल क्लब उदयपुरलाई हराउँदै फाइनलको यात्रा तय गरेको क्लबका अध्यक्ष अर्जुन भट्टराईले बताउनुभयो ।
ऐतिहासिक व्यक्तित्व तेअङसी सिरिजङघा सिं थेवेको ३ सय १९ औँ जन्म जयन्तिको अवसरमा आयोजित खेलमा जिल्ला बाहिरका पाँचथर, इलाम, झापा, उदयपुर र काठमाडौँका टीमलाई आमन्त्रण गरिएको थियो । गोल्ड कपको पहिलो संस्करणको उपाधि खेबाङ स्पोर्टिङ क्लब र दोश्रो सुनाकोटी सिटी एफसी काठमाडौँले हात पारेको थियो ।
प्रतिक्रिया