ताप्लेजुङ, पुस १२ गते । ताप्लेजुङमा सशस्त्र प्रहरीले बालसुबोधिनी संस्कृत माध्यमिक विद्यालयमा शीतलहर, हुस्सु र लागूऔषध दुर्व्यसन सम्बन्धी सचेतनामूलक कक्षा सञ्चालन गरेको छ । सशस्त्र प्रहरी बल नेपाल, नम्बर १ गुल्म हेडक्वार्टर कञ्चनजङ्घाले सचेतनामूलक कक्षा सञ्चालन गरेको हो ।
गुल्मले फुङ्लिङ नगरपालिका –३ मेदिबुङमा रहेको उक्त विद्यालयमा पुगेर सचेतना सम्बन्धी कक्षा सञ्चालन गरेको हो । विद्यालयका कक्षा ९ र १० मा अध्ययनरत विद्यार्थीलाई सहभागी गराई शुक्रबार सचेतना सम्बन्धी कक्षा सञ्चालन गरेको गुल्मले जनाएको छ । सचेतना सम्बन्धी सशस्त्र प्रहरी बल नेपाल, नम्बर १ गुल्म हेडक्वार्टर कञ्चनजङ्घाका गुल्मपति एवम् सशस्त्र प्रहरी नायब उपरीक्षक प्रमोद प्रकाश पाठकले कक्षा सञ्चालन गर्नुभएको थियो ।
करिव ८० जना विद्यार्थीलाई सहभागी गराएर सशस्त्र प्रहरी नायब उपरीक्षक पाठकले अहिलेको जाडो याममा असर गर्ने शीतलहर र हुस्सु तथा लागूऔषध दुर्व्यसन सम्बन्धी कक्षा चलाउनुभएको थियो । सचेतनामूलक कक्षा सञ्चालन गर्दै सशस्त्र प्रहरी नायब उपरीक्षक पाठकले शीतलहर र हुस्सुबाट जोगिने उपाय साथै लागूऔषधको कुलतले गर्ने हानी नोक्सानी र बेफाइदाबारे विद्यार्थीलाई अनुशिक्षण दिनुभएको थियो ।
प्रतिक्रिया