पाथिभरा मन्दिरमा एकै दिन सात हजार बढिले गरे दर्शन

ताप्लेजुङ । ताप्लेजुङको प्रसिद्ध तीर्थस्थल पाथिभरा मन्दिरमा एकै दिन सात हजार बढिले दर्शन गरेका छन् । शनिबार एकै दिन सात हजार एक सय ४६ जना भक्तजनले पाथिभरा मन्दीको दर्शन गरेका हुन् ।

दशैँ तिहार पछि शनिबार सबैभन्दा धेरै दर्शनार्थी पाथिभरा मन्दिर पुगेको पाथिभरा क्षेत्र विकास समितिका कर्मचारी राजेन्द्र महतले बताउँनुभयो । उहाँका अनुसार यस अघि दशैँ तिहारको समयमा मात्र यो प्रकारको भिड लागेको थियो ।

बिहान ३ बजेदेखि नै लाइन लगाएर गराइएको पूजा करिब दिउसो तीन बजेसम्ममा सकिएको उहाँले बताउँनुभयो । पछिल्लो समय केबुलकार विवादका कारण बन्द हड्ताल भएकाले पाथिभरा मन्दिर आउने दर्शनार्थीको सङ्ख्या कम हुँदै गएको थियो । यस अघि फागुन महिनामा सात हजार ४२८ दर्शनार्थी पाथीभरा मन्दिर पुगेका थिए ।

यस्तै माघ महिनामा भने चार हजार २४९ दर्शनार्थीले मात्र मन्दिरको दर्शन गरेका थिए । तर, शनिबार भने यो सिजनै धेरै दर्शनार्थी पाथिभरा मन्दिर आएको पाथिभरा क्षेत्र विकास समितिका कार्यकारी निर्देशक प्रजिन हाङबाङले जानकारी दिनुभयो । उहाँका अनुसार भोलि नवमीका दिन अझ धेरै आउने अपेक्षा गरिएको छ ।

यता हिजोदेखि पाथीभरा दर्शन गर्न आउने तीर्थयात्रीले ताप्लेजुङ सदरमुकाम फुङलिङ बजार, काफ्ले पाटी र माथिल्लो फेदीको होटलहरू भरिभराउ भएको छ । क्षेत्र विकास समितिका कर्मचारी राजेन्द्र महतका अनुसार पाथीभरा दर्शन गर्ने तीर्थयात्रीले माथिल्लो फेदीका होटलहरू सोमबार सम्मका लागि बुक गरिसकेका छन् ।

सदरमुकाम फुङलिङका धेरै जसो होटलहरू पनि शुक्रबारदेखि २५ गते सम्म होटल बुक भई सकेको बताइएको छ ।