ताप्लेजुङको मेहेलेमा आगलागी हुँदा ६ लाख क्षति

ताप्लेजुङ । ताप्लेजुङको मेहेलेमा आगलागी हुँदा ६ लाख रुपियाँको क्षति भएको छ । सिदिङबा गाउँपालिका ६ मेहेलेका स्थानीय हर्क तामाङको घरमा मङ्गलबार मध्यान्ह आगलागी हुँदा करिब ६ लाख रुपियाँको क्षति भएको हो ।

भान्सा घरमा चौपायाको लागि खोले पकाउने क्रममा आगलागी भएको जिल्ला प्रहरी कार्यालय ताप्लेजुङका प्रहरी निरीक्षक तथा सूचना अधिकारी विवेक बस्नेतले जानकारी दिनुभयो । उहाँका अनुसार आगलागीबाट तामाङको ढुङ्गा माटोले निर्मित जस्ताको पाताले छाएको ३ तले घर जलेर नष्ट भएको छ ।

आगलागीको खबर प्राप्त हुन साथ इलाका प्रहरी कार्यालय तेल्लोकबाट प्रहरी हवल्दार चन्द्र बहादुर विष्टको कमान्ड टोली खटाइएको थियो । सो टोलीको प्रयास करिब ३ बजे आगलागी पूर्ण रुपमा नियन्त्रणमा आएको प्रहरीले जनाएको छ ।

आगलागीबाट घर भित्र रहेको भाडा वर्तन, लत्ताकपडा, अन्नपात जलेर नष्ट भएको प्रहरीको भनाइ छ ।