आन्दोलनरत पक्ष सँग गृह मन्त्रीमार्फत भेटघाटको समय उपलब्ध भएको योगेश भट्टराईको भनाई

ताप्लेजुङ । प्रतिनिधि सभा सदस्य योगेशकुमार भट्टराईले केबलकार निर्माणको विरोध गरिरहेको आन्दोलनरत पक्ष सँग गृह मन्त्री रमेश लेखकले भेटघाटको समय उपलब्ध गराउनुभएको बताउनुभएको छ । गृह मन्त्रीमार्फत भोलि साँझ ६ बजे भेटघाटको समय उपलब्ध भएको उहाँले सामाजिक सञ्जाल मार्फत जानकारी गराउनुभएको छ । 

आज बिहान १० बजेदेखि अपरान्ह १२ बजेसम्म निर्माणाधीन पाथिभरा केबलकारका बारेमा आन्दोलनरत पक्षका प्रतिनिधिहरू सँग संवाद भएको र वहाँहरूले गृह मन्त्रीज्यू समक्ष भेटेर आफ्ना कुरा राखन चाहेकाले गृह मन्त्री समक्ष अनुरोध गरि उक्त समय उपलब्ध भएको जानकारी दिनुभएको छ । 

साथै आन्दोलनरत पक्षलाई सरकारले तोकेको वार्ता समितिसँग छलफललाई निरन्तरता दिएर वार्ता मार्फत समस्याको समाधान गर्न अनुरोध समेत गर्नु भएको छ । आज भएको आन्दोलनरत पक्ष र सरकारबीचको वार्ता बिना निष्कर्ष टुङ्गिएको छ । 

बसेरा होटल, सिंहदरबार काठमाडौंमा आज बसेको वार्ता विना निष्कर्ष टुङ्गिएको हो ।  मुक्कुमलुङमा नो केबलकार आन्दोलनको तर्फबाट सहजीकरण वार्ता टोलीका खगेन्द्र माखिमका अनुसार करिब ४० मिनेट पछि वार्ता विना निष्कर्ष टुङ्गिएको हो । मागको विषयमा सहमति कायम हुन नसक्दा वार्ता निचोडमा पुग्न नसकेको आन्दोलनरत पक्षको भनाई छ ।