ताप्लेजुङ, भदौ १७ गते । पाँचथरको फिदिम स्पोर्टिङ क्लब अन्तर्राष्ट्रिय आमन्त्रण चौथो ताप्लेजुङ गोल्डकप फुटबल प्रतियोगिताको फाइनलमा प्रवेश गरेको छ । बुधबार भएको अन्तिम सेमिफाइनल खेलमा झापा–११ लाई १–० गोल अन्तरले पराजित गर्दै पाँचथर फाइनलमा प्रवेश गरेको हो ।
यो सँगै अब शुक्रबार हुने फाइनल खेलमा उपाधिका लागि पाँचथरले साविक विजेता सलहेश युवा क्लब सिराहा सँग प्रतिस्पर्धा गर्ने छ । मङ्गलबार भएको पहिलो सेमिफाइनल खेलमा अन्तराष्ट्रिय टोली भारतको जर्जियन युनाइटेड फुटबल क्लबलाई २–० गोल अन्तरले पराजित गर्दै सलहेश युवा क्लब सिराहा फाइनल प्रवेश गरेको हो ।
लाखेजात्रा सञ्चालन समितिको आयोजनामा भानुजन माध्यमिक विद्यालयको खेलमैदानमा सञ्चालन भएको प्रतियोगितामा आठ वटा टिमको सहभागिता रहेको थियो । लाखेजात्राको अवसरमा हरेक वर्ष सञ्चालन हुँदै आइरहेको प्रतियोगिता २०८० सालदेखि ताप्लेजुङ गोल्डकपको नामबाट सञ्चालन हुँदै आएको छ । प्रतियोगिताको विजेताले नगद सात लाख दुई हजार ८३ रुपियाँ र उपविजेताले तीन लाख ५२ हजार ८३ रुपियाँ सहित ट्रफी, मेडल र प्रमाण पत्र प्राप्त गर्नेछन् ।
प्रतियोगिताको सर्वोत्कृष्ट खेलाडीलाई बजाज कम्पनीको मोटरसाइकल उपलब्ध गराइने सञ्चालन समितिका कोषाध्यक्ष दावा शेर्पाले बताउनुभयो । योसँगै विभिन्न विधाका उत्कृष्ट खेलाडी र हरेक दिनको म्यान अफ दि म्याच खेलाडीलाईसमेत नगद पुरस्कार ट्रफी, मेडल र प्रमाणपत्रको व्यवस्था गरिएको छ ।
यस्तै, भाग्यशाली एक जना दर्शकले स्कुटर उपहार पाउने छन् ।
प्रतिक्रिया