ताप्लेजुङ, पुस १७ गते । नवप्रयास युथ क्लब हाङ्देवा फक्ताङ्लुङ गाउँपालिका–२ खेजेनिममा जारी मानाभरा गोल्डकपको सेमिफाइनलमा प्रवेश गरेको छ । बिहीबार सम्पन्न भएको अन्तिम क्वाटरफाइनल खेलमा प्रगतिशील युवा क्लब मेरिङ्देन–४ लिङ्तेपलाई २–० गोल अन्तरले पराजित गर्दै नवप्रयास सेमिफाइनलमा प्रवेश गरेको हो ।
यो सँगै नव प्रयासले सेमिफाइनलमा लालिगुराँस युथ क्लब सुरुङ्खिम सँग भेट पक्का गरेको छ । बुधबार भएको पहिलो क्वाटरफाइनल खेलमा सिँवा स्पोर्टिङ फक्ताङलुङलाई ४–० गोल अन्तरले पराजित गर्दै लालिगुराँस सेमिफाइनलमा प्रवेश गरेको हो । भोलि नै हुने पहिलो सेमिफाइनल खेलमा जनसेवा आर्दश स्पोर्टिङ क्लब र माछापोखरी हिटी क्लब चाँगे बिच प्रतिस्पर्धा हुने मानाभरा स्पोर्टिङ क्लबका सचिव मौसम अन्छङ्बोले जानकारी दिनुभयो ।
उहाँका अनुसार बुधबार भएको क्वाटरफाइनल खेलमा लिखु भुजी रामेछाप युथ क्लब काठमाडौँलाई २–१ गोल अन्तरले पराजित गर्दै जनसेवा आर्दश स्पोर्टिङ क्लब ढुङगेसाँघु सेमिफाइनलमा प्रवेश गरेको हो । यस्तै मङ्गलबार भएको उद्घाटन खेलमा मानाभारा युथ स्पोर्टिङ क्लब आयोजकलाई टाइब्रेकरमा ५–३ गोलअन्तरले पराजित गर्दै चाँगे सेमिफाइनलमा प्रवेश गरेको हो ।
प्रतियोगिताको विजेताले नगद ३ लाख २ हजार ८२ रुपियाँ सहित ट्रफी, मेडल र प्रमाण पत्र प्राप्त गर्ने छन् । यस्तै उपविजेतालाई नगद १ लाख ५२ हजार ८२ रुपियाँ सहित ट्रफी, मेडल र प्रमाण पत्रको व्यवस्था गरिएको मानाभारा स्पोर्टिङ क्लबका सचिव मौसम अन्छङ्बोले बताउँनुभयो । साथै विभिन्न विधामा सर्वोत्कृष्ट बन्ने खेलाडीलाई समेत उचित नगद पुरस्कारको व्यवस्था गरिएको आयोजकले जनाएको छ ।
स्थानीय स्तरमा उत्पादित प्रमुख नगदे बाली अलैँचीको प्रवर्द्धन साथै विश्वमा छरिएर रहनु भएका लिम्बू जातिको शिर उठाउने ठाउँ ‘नाहाङ्मा–यक’ र गडीडाँडाको संरक्षण तथा प्रचार प्रसारका लागि गोल्ड कपको आयोजना गरिएको क्लबका संरक्षक विकास साम्रा रविनले जानकारी दिनुभयो ।
खेजेनिमको आहाले टारमा सञ्चालन भइरहेको प्रतियोगिताको फाइनल खेल शनिबार हुने छ ।
प्रतिक्रिया