ताप्लेजुङ, पुष २ गते । ऐतिहासिक पुषे मेलामा आज अन्तर जिल्ला क्लब स्तरीय भलिबल प्रतियोगिताको उद्घाटन खेलमा भोजपुर र कोशीबिच प्रतिस्पर्धा हुँदै छ । हरेक वर्षको पुष १ गतेदेखि ५ गतेसम्म सञ्चालन हुने मेलाको उद्घाटन खेलमा आज भोजपुर र कोशी भिड्ने भएको हो ।
हिजोबाट सुरु भएको मेलाको औपचारिक उद्घाटन भने आज मात्र हुने भएको छ । पुषे मेला सञ्चालन समिति तथा दोभान स्पोर्टिङ क्लबका अध्यक्ष हेम सिरेङचोङबाङका अनुसार आवश्यक तयारी हिजो मात्र पुरा भएकाले उद्घाटनको कार्यक्रम आजका लागि सारिएको हो । कार्यक्रमको उद्घाटन मेरिङदेन गाउँपालिकाका अध्यक्ष युकहाङबीर हाङगाम डम्बरको प्रमुख आतिथ्यतामा हुने आयोजकले जनाएको छ ।
अन्तर जिल्ला क्लब स्तरीय भलिबल प्रतियोगितामा भारतको टिमले सहभागिता जनाउने गरि सम्पर्क गरेको तर हिजो आइ नपुगेकाले मेलाको उद्घाटन सम्भव नभएको सचिव गणेश कार्की ढोलीले जानकारी दिनुभयो । उहाँका अनुसार भारतको खेलाडी नआउने अन्तिम समयमा टुङ्गो लागेपछि प्रतियोगितामा ५ टिमको मात्र सहभागिता रहने भएको छ ।
यस्तै आज हुने दोश्रो खेलमा मुकेश मेमोरियल र दमक झापाबीच प्रतिष्पर्धा हुँदैछ । त्यस्तै भोलि पहिलो खेलमा कोशी र सभापोखरी सङ्खुवासभा तथा दोश्रो खेलमा भोजपुर र सभापोखरी भिड्दै छन् ।
मेरिङदेन गाउँपालिका र आठराई त्रिवेणी गाउँपालिकाको संगम स्थल दोभान बजारमा विगत ५२ वर्ष अघि देखि लाग्दै आएको मेलामा यस वर्ष अन्तराष्ट्रिय आमन्त्रण अन्तर जिल्ला क्लब स्तरीय पुरुष भलिबल प्रतियोगिता, ब्याडमिन्टन प्रतियोगिता, ¥याफ्टिङ, साँस्कृतिक कार्यक्रम तथा स्थानीय स्तरमा उत्पादित कृषि सामाग्रीहरूको बजारीकरण गरिनेछ ।
प्रतियोगिताको विजेताले नगद तीन लाख रुपियाँ सहित ट्रफी मेडल र प्रमाण पत्र प्राप्त गर्ने कार्की डोलीको भनाई छ । यस्तै दोस्रो हुने टिमले नगद एक लाख ७५ हजार रुपियाँ सहित ट्रफी, मेडल र प्रमाण पत्र प्राप्त गर्ने छन् । सेमिफाइनलमा पुग्न सफल दुई टिमलाई ५० हजार रुपियाँ सहित ट्रफी, मेडल र प्रमाण पत्रको व्यवस्था गरिएको छ भने विभिन्न विधाका उत्कृष्ट खेलाडीहरूको लागि पनि उचित पुरस्कारको व्यवस्था गरिएको छ ।
यस्तै ब्याडमिन्टन प्रतियोगिता कोशी प्रदेश स्तरीय र जिल्ला स्तरीय सञ्चालन हुने छ । जसमा कोशी प्रदेश स्तरीयका प्रथम, द्वितीय, तृतीय र चौथोलाई क्रमश नगद ५२ हजार, ३० हजार ७० हजार र ७० हजार रुपियाँको व्यवस्था गरिएको छ । जिल्ला स्तरीयका प्रथम र द्वितीयलाई क्रमश नगद २५ हजार र १२ हजार रुपियाँको व्यवस्था गरिएको छ ।
मेलाका लागि पुष ३ र ४ गते मेरिङ्देन गाउँपालिकाले स्थानीय बिदा समेत प्रदान गरेको छ । मेला सम्पन्न गर्नका लागि ३६ लाख रुपियाँ खर्च हुने अनुमान गरिएको आयोजकले जनाएको छ । मेलाको प्रयोजकमा मेरिङदेन गाउँपालिका, आठराई त्रिवेणी गाउँपालिका, मिक्वाखोला गाउँपालिका सहित केही प्रतिष्ठित निजी कम्पनीहरू रहेका छन् ।
प्रतिक्रिया