मुक्कुम्लुङ साहित्य प्रतिष्ठानको स्थापना दिवसको अवसरमा साहित्य गोष्ठी 

ताप्लेजुङ, कात्तिक २२ गते । मुक्कुम्लुङ साहित्य प्रतिष्ठानको स्थापना दिवसको अवसरमा साहित्य गोष्ठी कार्यक्रम आयोजना गरिएको छ । प्रतिष्ठानको प्रथम स्थापना दिवसको अवसरमा एक दिने साहित्य गोष्ठी कार्यक्रमको आयोजना गरिएको । 

प्रतिष्ठानले दिवसकै अवसरमा फुङलिङ नगरपालिका ९ हाङदेवाका ७२ वर्षीय लेख बहादुर मादेनलाई सम्मान समेत गरेको छ । मादेनले थोक्ला किराँत लिम्बू वर्णमाला र ताप्लेजुङको पौराणिक इतिहास समेटिएको पुस्तक प्रकाश गरि साहित्यको क्षेत्रमा योगदान पु¥याउनु भएकाले सम्मान गरिएको प्रतिष्ठानका अध्यक्ष मनिष हेल्लोकले जानकारी दिनुभयो । उहाँका अनुसार मादेनलाई दोसल्ल ओढाएर प्रशंसा पत्र प्रदान गरि सम्मान गरिएको छ । 

सम्मान कार्यक्रमले साहित्य क्षेत्रमा प्रवेश गर्दे गरेका उदयमान साहित्यकारलाई समेत प्रेरणा मिल्ने प्रतिष्ठानको विश्वास रहेको छ । कार्यक्रममा जिल्लाका अग्रज साहित्यकार तथा साहित्य क्षेत्रमा उदाउँदै गरेका श्रष्टाहरुले आफ्ना रचना वाचन गरेका थिए । प्रतिष्ठानका अध्यक्ष हेल्लोकका अनुसार अग्रज साहित्यकारहरू उदय अपेक्ष साउदेन, लक्ष्मी प्रसाद चुँडाल, धनपति ढुङ्गेल, शान्तिराम नेपाल, प्रशान्त लेखक, लिला आँसु लगायतले रचना वाचन गर्नु भएको थियो । 

कार्यक्रममा प्रमुख अतिथि जिल्ला समन्वय समितिका प्रमुख छिरिङ लामा, विशिष्ट अतिथि प्रदेशका पूर्वमन्त्री बल बहादुर साम्सोहाङ प्रतिष्ठानका प्रतिनिधि अन्य साहित्यकारहरुको उपस्थिति रहेको थियो ।